EHUren Uda Ikastaroak Igartzako jauregira ekarriko ditu irailaren 10ean arlo publikoko eta pribatuko goi-mailako adituak, azken miliako banaketa-ereduak eta soluzio teknologikoak aztertzeko
Izen-ematea zabalik dago oraindik www.uik.eus atarian; topaketak tokiko merkataritzaren digitalizazioa eta hiri-espazioen kudeaketa deskarbonizatua izanen ditu ardatz nagusi
Datorren ostegunean, irailaren 10ean, Beasain eta Igartzako jauregi historikoa Euskal Herriko hiri-mugikortasun eta logistika jasangarriaren gune nagusi bilakatuko dira. EHUKO Uda Ikastaroen (UIK) esparruan eta Beasaingo Udalaren babesarekin, "Hiri-Logistikaren Transformazioa: Teknologia eta Eredu Arrakastatsuak" izenburuko jardunaldi teknikoa egingo da. Topaketaren atarian, antolatzaileek izen-ematea zabalik dagoela gogorarazi nahi diete unibertsitateko ikasleei, ikertzaileei, mugikortasun-teknikariei eta, bereziki, tokiko merkataritzaren eta industriaren arloko profesionalei.
Etxez etxeko erosketen eta merkataritza elektronikoaren gorakada geldiezinak erronka konplexuak jarri ditu mahai gainean: herri-zentroen kolapsoa, errepide bidezko garraioak eragindako emisioak (% 25 EB mailan) eta tokiko saltokiek online plataforma handien aurrean bizi duten lehiakortasuna. Testuinguru honetan, Beasaingo jardunaldiak konponbide praktiko eta aplikagarriak aurkeztuko ditu, teoria hutsaz haratago joanez.
Eredu arrakastatsuak eta puntako teknologia
Egun osoan zehar, Europan eta Euskal Herrian bertan abian jarritako esperientzia erreala eta eraginkorrak ezagutzeko aukera izango da:
Goi-mailako estrategia publikoak eta pribatuak: Jordi EspĂnekin (TRANSPRIME) eta Enrique Sánchezekin (STANDTRACK) azken miliako plangintza eta salgaien banaketa-estandarrak aztertuko dira.
Kasu praktikoak: Madrilgo Udalaren "Canalejas 360" mugikortasun eta logistika-hub deskarbonizatua, Bartzelonako "TACTIC Logistics" proiektua eta Beasaingo "Tori!" ekimen aitzindaria izango dituzte hizpide adituek.
Teknologia eta tokiko merkataritza: Smartlog, Hermeneus World eta BasqueCCAM erakundeetako ordezkariek intralogistika adimenduna, plataforma digitalak eta locker edo takila adimentsuak aurkeztuko dituzte, tokiko saltokiek beren produktuak bezeroaren atariraino ingurumena kaltetu gabe eraman ditzaten.
Udalaren apustu estrategikoa
Beasaingo Udalarentzat, jardunaldi hau ez da ekitaldi akademiko isolatu bat. Udal gobernuaren klima-aldaketaren aurkako konpromisoaren, kalitatezko hiri-espazioen sorkuntzaren eta tokiko ekonomiaren digitalizazioaren baitan kokatzen da. Helburua argia da: gure herriak bizigarriagoak egitea eta tokiko merkataritzari etorkizuneko lehiakortasunerako tresnak eskaintzea.
Matrikulazioa azken unean
Ikastaroan parte hartzeko epea irailaren 10ean bertan ikastaroa hasi arte egongo da zabalik www.uik.eus webgunean. Gazteek (18-25 urte) eta hainbat kolektibok tarifa bereziak dituzte.
