Beasain, hiri-logistika berritzailearen erreferente bilakatzen jarraitzen du Uda Ikastaroekin
Egungo erronkei irtenbide jasangarriak emateko, Udalak eta EHUk ezagutzaren aldeko apustua egiten dute elkarrekin
Beasaingo Udalak eta Euskal Herriko Unibertsitateko (EHU) Uda Ikastaroak Fundazioak bosgarren urtez jarraian antolaturik, Uda Ikastaroak berriro iritsiko dira herrira. Irailaren 11n, Igartzako jauregian, 'Azken miliako banaketa, lehen mailako erronka' izenburuko ikastaroa ospatuko da, hirietako logistika eraginkorragoa eta jasangarriagoa bilatzeko asmoz.
Ekainean aurkeztu zen ekitaldiaren harira, Udalak gogora ekarri nahi izan du ikastaro honen garrantzia estrategikoa, udal gobernuak bere helburuen artean dauzkan bi ardatz nagusiei erantzuten baitie: mugikortasun eta logistika jasangarriaren garapena, eta klima-aldaketari aurre egiteko konpromisoa, espazio publiko atseginagoak eta seguruagoak lortzeko.
Ezagutzak eragina izan dezan
Beasaingo Udalak, Udalaren eta EHUren arteko lankidetza honen balioa azpimarratu du elkarlan horrek Beasaini eskaintzen dion balioagatik. Uda ikastaroak ez dira jarduera akademiko hutsak; ezagutza partekatzeko, ikuspegiak trukatzeko eta gizartean eragina duten gaiak eztabaidatzeko topaguneak dira. Eta hori da, hain zuzen, Igartzako jauregiari eman nahi zaion erabilera: ezagutzaren, pentsamenduaren eta lankidetzaren gune bihurtzea.
Aditu eta erakunde esanguratsuen parte-hartzea
Ikastaroak, Adur Ugartemendia (Beasaingo Udaleko Lurraldea saileko burua) zuzendaritzapean, hirietan azken urteotan komertzio elektronikoaren eta erosketa ohituren aldaketaren ondorioz pakete banaketa zerbitzuek duten inpaktua aztertuko da (trafikoan, bide-segurtasunean, kutsaduran...). Erronka horri aurre egiteko, soluzio teknologiko berritzaileak eta hiri-logistika eredu aurreratuak ere aurkeztuko dira, hala nola plataforma digital iraultzaileak, ibilgailu deskarbonizatuak eta 'locker' adimendunak.
Ikastarora EIT Urban Mobility, GERTEK eta BAX - Urban Mobility erakundeetako adituak bilduko dira, baita Vitoria-Gasteiz Mobility Lab, Euskadiko Mugikortasun eta Logistika Kluster eta BasqueCCAM zentroko ordezkariak ere, praktika onenak eta etorkizuneko ereduak ekarriz.
Informazio praktikoa
Ikastaroa irailaren 11n izango da, Igartzako jauregian. Orokorreko publikoari, unibertsitateko ikasle eta irakasleei, eta mugikortasun eta logistika arloko profesionalei zuzendua dago. Matrikula irekita dago eta prezio bereziak daude gazteentzat eta beste kolektibo batzuentzat. Informazio gehiago eta izen-emateko aukera www.uik.eus web-orrian dago eskuragarri.
