Nafarroa etorbidean abiatu den zoladura-aldaketak espazioaren izaera oinezkoagoa indartzea du helburu, garajeetarako sarbidea eta bizikleten zirkulazioa mantenduta
Azken hilabeteetan amaitutako eta amaitzear dauden esku-hartzeek, bide-segurtasuna, irisgarritasuna eta trafikoaren antolaketa hobetzea dute ardatz
Beasaingo Udalak azken urtean iragarri eta martxan jarritako hiri-mugikortasuneko eta bide-segurtasuneko esku-hartze nagusien egoeraren berri eman du, Hiri Mugikortasun Jasangarrirako Planaren baitan egindako lanen jarraipen gisa. Helburua argia da: oinezkoen lehentasuna indartzea, irisgarritasuna hobetzea eta eguneroko joan-etorriak seguruagoak eta erosoagoak izatea.
Nafarroa etorbidean oinezkoaren izaera indartzea
Une honetan abian dagoen jarduketa nagusia Nafarroa etorbidean kokatzen da, 1. zenbakiaren eta Barrendain plazaren arteko tartean. Esku-hartzea espazioaren erabilera errealari eta beharrei erantzuteko beharrezkotzat jo da.
Zoladuraren azalera aldatzen ari da, oinezkoentzako gune baten itxura nagusitu dadin. Gaur egun, nahiz eta pertsonentzat lehentasunezko espazioa izan, itxura eta materialen ondorioz ez du oinez ibiltzera gonbidatzen. Horregatik, espaloien formari jarraipena emango zaio, zoladuran bertan zenefak txertatuz, espazioaren irakurketa bisuala eta erabilera hobetzeko. Jarduketak garajeetarako ibilgailuen pasabidea mantentzen du, baita bizikletena ere, baina oinezkoen nagusitasuna argi adieraziz.
Amaitutako esku-hartzeak
Azken hilabeteetan hainbat jarduketa amaitu dira, trafikoaren antolaketa hobetzeko eta herritarren eguneroko beharrei erantzuteko, besteak beste:
- Zaldizurretako biribilgunean “Kaixo & Agur” gune segurua egokitu da, pertsonak azkar eta segurtasunez utzi edo jasotzeko, zirkulaziorako puntu estrategiko batean.
- Iturralde kaleko autobus geltokia lekuz aldatu eta irisgarritasuna hobetu da, espaloia egokituz eta garraio publikoaren erabilera erosoagoa eginez.
- Bernedoenean aparkaleku plaza berriak sortu dira, osasun etxearen ondoan eta Adifeko nasa aldean, auzotarrek adierazitako aparkaleku-beharrari erantzunez.
Amaitzear dauden jarduketak
Bestalde, hainbat esku-hartze azken fasean daude:
- Oinezkoen pasabide berria Igartza Oleta kalean, Loinatz futbol zelaiaren aparkalekurako sarreraren parean.
- Oinezkoen pasabide berria Iturriotz kalea 27. zenbakian, bidegurutze horretako segurtasuna handitzeko.
- Gernika pasealekuko parking-aren irteerako biraren moldaketa, trafikoaren ikusgarritasuna eta segurtasuna hobetzeko.
- Garin auzoko obrak, saneamendu-obren ondorioz beharrezkoak diren zoladura eta antolaketa lanekin.
Udalak azpimarratu du esku-hartze hauek guztiak ez direla jarduketa isolatuak, baizik eta espazio publikoaren kalitatea, segurtasuna eta irisgarritasuna hobetzeko estrategia bateratu baten parte. Obrak amaitzean, herritarren eguneroko mugikortasunean eta bizi-kalitatean eragin positiboa izango dutela nabarmendu da.
