A1etik C2ra arteko maila guztiak, autoikaskuntza eta sektorekako ikastaro bereziak eskainiko dira urriaren 1ean hasiko den ikasturtean
Txandakako langileentzat zein ostalaritza eta merkataritzako langileentzat egokitutako ordutegi malguak eta dirulaguntzak bermatuko ditu Udalak
Beasaingo Udal Euskaltegiak matrikulazio epea ireki du 2026-2027 ikasturteko ikastaro osorako. Irailaren 1etik 18ra bitartean eman ahalko da izena Udal Euskaltegiaren idazkaritzan edo telematikoki, maila eta profilarik anitzenei erantzuteko prestaturiko ikaskuntza-eskaintza zabalean.
Eskaintza zabala eta egokitua
Ikasleen behar eta helburuetara egokitutako modalitateak prestatu ditu Beasaingo Udal Euskaltegiak. Eskaintzak maila guztietako ikastaroak hartzen ditu barne (A1, A2, B1, B2, C1 eta C2), eta aurrez aurreko eskolak (astean 2, 3 edo 4 egunetan) zein autoikaskuntza konbinatzeko aukera egongo da.
Titulazioa lortu nahi dutenei zein euskaraz idazteko eta hitz egiteko erraztasuna handitu nahi duten euskaldunei zuzendutako saioak eskainiko dira. Halaber, herriko ostalaritza eta merkataritza sektoreetako langileentzat diseinatutako oinarrizko ikastaro bereziak ere egongo dira aukeran.
Ordutegi malgua eta dirulaguntzak
Lanean zein egunerokoan moldagarritasuna behar duten Herritarrei begira, ordutegi malgua jarri da martxan. Maila gehienetan taldeak goizez zein arratsaldez osatuko dira; ondorioz, txandaka lan egiten duten pertsonek klaseetara ere txandaka etortzeko erraztasuna izango dute.
Bestalde, euskara ikasteko bidean ahalmen ekonomikoa oztopo izan ez dadin, matrikularen ordainketan erraztasunak emango dira eta ikasleek bai Beasaingo Udalaren zein HABEren dirulaguntzak jasotzeko aukera izango dute. Ikasturte osoko ikastaroak urriaren 1ean hasiko dira.
Datu nagusiak
- Matrikulazio epea: Irailaren 1etik 18ra.
- Ikastaro hasiera: Urriaren 1a.
- Mailak eta aukerak: A1, A2, B1, B2, C1 eta C2. Aurrez aurrekoa (2, 3 edo 4 egun) eta autoikaskuntza.
- Ikastaro bereziak: Euskaraz hobetzeko saioak, eta merkataritza zein ostalaritzako langileentzako oinarrizko ikastaroak.
- Inskripzio-lekua: Udal Euskaltegiko idazkaritza (J.M. Iturriotz kalea, LANBIDEren parean).
- Bulego-ordutegia: Goizez 10:00etatik 12:00etara eta arratsaldez 16:00etatik 18:00etara.
- Harremanetarako bideak: 943 028 100 / 688 740 385 |
Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. | www.beasain.eus/euskaltegia
