Hamargarren edizio borobil honetan, Beasain Kirol Sariek BKLko emakumezko beteranoen taldea, Beasain KEko lehen taldea, San Silbestre krosaren 50. edizioa eta AMPO enpresa sarituko dituzte. Sari Nagusia abenduaren 22an jakinaraziko da Igartzako jauregian egingo den galan
2025eko sarituen zerrendak kirol arloko joera eta jite desberdinak bateratzen ditu: emakumeen eta gizonen presentzia orekatua, talde beterano zein gazteen lana, eta herriko kluben ahalegin jarraitua. Aurkeztutako hautagaitza guztiak herritarrek eta tokiko taldeek proposatuak izan dira, eta horrek sarien izaera partekatu eta herritarra indartzen du. Epaimahaiak guztien artean merezimenduzkoenak hautatu ditu, oinarrietan jasotako irizpide zorrotzen arabera .
2025eko saritu nagusiak:
- Emakumezko kirolari edo taldearen saria: BKLko nesken talde Beteranoa (Saskibaloia)
- Gizonezko kirolari edo taldearen saria: Beasain K.E. – 2 RFEFera igoera (Futbola)
- Urteko kirol jarduera: L. San Silbestre Krosa (Beti Bizi Elkartea)
- Erakunde babeslea: AMPO
- 2025eko Sari Nagusia: abenduaren 22ko galan jakinaraziko da; sekretupean gordetzen da ekitaldiari emozioa eta une berezi bat gehitzeko.
Eguneroko ahaleginaren aitortza zintzoa
Aipamen bereziek Beasaingo kirolaren aniztasuna erakusten dute: futbola, pilota, atletismoa, txirrindularitza, eta ekimen sozialak. Aipamen bakoitzak eguneroko lanari, konpromisoari edo lorpen esanguratsu bati egiten dio keinua .
2025eko aipamen bereziak
- Berdintasun Txapelketa – Emakumezkoen futbola (Goierri Gorri)
- XV. San Silbestre Txiki Solidarioa (Batzokia Kultur Elkartea)
- Aritz Aldasoro (Futbolaria)
- Beñat Azketa (Pilotaria)
- Manex Gibelalde (Futbolaria)
- Koldo Galarreta (Lasterkaria)
- Maitane Garro (Futbolaria)
- Naxara Odriozola (Txirrindularia)
- Maren Higuero (Atletismoa)
Aipamen bereziak sarien nortasunaren parte dira: talentua ez ezik, ahalegina, dedikazioa, eta herriari atxikimendua ere ikusarazten dute, askotan isilpean egiten den lana azalera ekarriz.
Udalaren sariak
Beasaingo Udalak izendatutako Ohorezko Beasain Saria Ehunmilak probako antolakuntzari emango dio urteetan ekitaldi hau antolatzen egindako ahalegin guztiagatik. Bestalde, kirol ibilbideari saria Txema Agirre fisioari emango dio kirolariei eta orohar gainerako pertsonei eskainitako dedikazioa osasungintzan.
Kirol Sariak ez lirateke gaur egun diren bezain fidagarriak izango, oinarrietan zehaztutako zortzi kideko epaimahaia gabe. Haien egitekoa ez da soilik saridunak aukeratzea. Hautagaitza bakoitza xehetasunez aztertzea, kirol diziplina oso ezberdinen arteko konparazio justua egitea, balio sozialak, berdintasuna eta herri-ekarpena kontuan hartzea eta sarien izaera objektiboa bermatzea kontuan hartu dira.
Epaimahaiko kideek kirol arlo ezberdinetan jarduteaz gain, jakintza, esperientzia eta herriaren ezagutza uztartzen dituzte; horri esker, erabaki garden eta arrazoituak bermatzen dira urtero.
Komunitate-sentimendua: Beasain herri kirolzalea
Sariek helburu argi bat dute sortu zirenetik: Beasaingo kirolari eta elkarteen lana balioan jartzea eta herriaren nortasun kolektiboa sendotzea.
2016an udal gobernuak abian jarritako ekimena, oinarrietan gogorarazten den bezala, kirolak pertsonengan eta komunitatean duen eragin zuzenean oinarritzen da: ongizatea, autoestimua, bizikidetza eta garapen pertsonala eta soziala sustatzen ditu .
Hamargarren edizioan, balio horiek inoiz baino presenteago daude. Generoen arteko oreka, adin desberdinen aitorpena, herri-parte hartzea, eta kirolak sustatzen duen bizimodu osasuntsua.
Kirolaren urteko jaia eta topagune berezia
Abenduaren 22an, 19:00etan, Igartzako jauregian egingo den gala urteko une esanguratsuenetako bat da. Aurten, gainera, hamargarren edizioa ospatzen denez, giro berezia espero da. Galan sari guztien banaketa egingo da eta Sari Nagusia ezagutaraziko da.
Udalaren YouTubeko kanaletik zuzenean ikusi ahal izango da ekitaldia eta grabatua geratuko denez, ondoren ere ikusgai izango da. Bertan aurkitzen dira aurreko edizioetako ekitaldiak ikusgai. Halaber, irudi esanguratsuenaz osatutako argazki-galeria ere edonoren eskura egongo da ikusgai udalaren webean.
Ekitaldia urtero bihurtu da Beasaingo kirol komunitatearen topaleku; bertan elkartzen dira kirolariak, entrenatzaileak, familiak, klubak, zaleak eta herriko eragileak. Giro hunkigarria sortzen da, eta amaieran eskaintzen den luntxa aukera ezin hobea da esperientziak partekatzeko eta harreman berriak sortzeko.
