"Azoka eta elikadura osasuntsua" programa
"Azoka eta Elikadura Osasuntsua" Beasaingo bost ikastetxek Eskolako Agenda 2030en esparruan, Udalarekin, herriko baserritar eta ekoizleekin, Osakidetzarekin eta Minbiziaren Aurkako Elkartearekin batera, 2023tik elkarlanean garatu duten ekimen oparoa da.
Egitasmo honen helburu nagusia Beasaingo azoka indartzea da, bertako eta garaiko produktuen kontsumo arduratsua (12. Garapen Jasangarrirako Helburua) sustatuz eta hauen balio sozial, ekonomiko zein osasungarriak agerian utziz.
Proiektu honetan familiek ezinbesteko rola jokatzen dute eskolan ikasitakoa etxeko sukaldeetara eramateko. Ibilbide honetan, ikasleek elikadura-tailerretan parte hartu dute, baserriak eta azoka bertatik bertara ezagutu dituzte, eta erosketak sustatzeko deskontu-bonuak zein poltsak diseinatu dituzte.
Azken urrats gisa, azoka biziagoa egiteko asmoz, gure ekoizleen lana eta bizitza dokumentatzen duten bideo-omenaldiak grabatu dituzte herritar guztien eskura jartzeko.
