SARA CLAUDIA MICULAICIUC
FILTROEN ATZEAN
Doinua: Ispiluarena (Lazkao Txiki)
Pantaila gaurko buruzagi,
filtroek kendu zimurra,
baina nik pentsatzen dut orduan:
«kenduko al du beldurra?».
Bata kentzen du, baina bestea…
zuk ez sinetsi gezurra,
bilakatuko zaituena zu
izatea soil ikurra.
Seguruenik besteentzako
marka bat izanik ere,
zu izan zaitez berdingabea
ez jarraitu haien lege;
bestela esklabotasunera,
ez eman haiei botere,
eta gorde berezitasuna
kontuz nor duzun errege!
Aurpegi berdinak dira nagusi
gaur egungo gizartean.
Non desberdina arraroa den,
zer daukazu zuk barnean?
Askok dute zorion faltsua
zer egingo bitartean?
Gizartera egokitu, ala
esperantza bihotzean?
Ez zara onartua izango
emango diezu “pena”,
baina denen artean bakarrik
zu, berezia zarena,
lortuko duzu zu izatea,
ez betirako haiena.
Piztuta jarraituko duzu zuk,
lurretik altxatu dena.
