ERLANTZ FURUNDARENA AGIRRE
Hamalau urte ditut eta DBH 2.maila egiten ari naiz Andramendi Ikastolan. Zaletasun ugari ditut, musika, dantza, padelean aritzea, irakurtzea... Komikiak ikaragarri gustatzen zaizkit. Bertsolaritzan ere aritua naiz, baina denerako denborarik ez eta utzi egin behar izan nuen, orain etxean familian aritzen gara tarteka.
ALTXA GAITEZEN
Pelikula guztiak
politak, xarmantak,
protagonistak beti
ederrak, galantak,
izaten dituzte, bai,
arazo ta dramak,
baina gaizki bukatzen
esaidazu zenbat,
bizi errealean
gezurra, erabat!
Benetako munduan
gaiztoak agintzen,
munduaren erdia
gosez dago, hiltzen,
borroka, miseria,
handitzen, handitzen,
guzti honek burua
ez digu argitzen,
ez dakigu denbora
ongi erabiltzen.
Agintariei diet
askotan antzeman,
jarri nahi gaituztela
elkarrekin teman,
ez gaitezen ba sartu
beraien eskeman,
eta behingoz elkarri
bostekoa eman,
izan protagonista
munduko zineman.
Elkartu gaitezen ba,
goazen kalera
mundu hobeago bat
aldarrikatzera,
indar handia dugu
guztiok batera,
oztopoen aurrean
ez egin atzera,
antolatu gaitezen,
badugu aukera!
