AIORA AGIRRE YARZA

LOGELAN

Logelan,

arropak hankaz gora

egun haiek ahantzi nahian

tiraderak ditu baztertu

haiza dezaten ke beltza hemendik

URRUN

Logelan, 

ohe erdi egina, erdi egin gabea

ametsen zaindariak dira gelditu

baina jada sentitzen dira gatibu

joan nahi dute hemendik

URRUN

Logelan, 

liburu bat ahuspez, bestea hetsita

azala hitzak ostentzearen erantzule

orriek dar-dar, askatasunaren xerka

egia gordina konta dezaten hemendik

URRUN

Logelan, 

hiru edalontzi (erdi) huts

batean kafea, mikatza eta mingarria

bestean ura, gardena baina  hormatua

eta azkenekoa hutsik, isiltasunez betea

ezer ez dena

edo horrela pentsatzea nahiago

Logelan, 

hamarrak ezkero edalontziek dardara

hirurak nahasi dira, logela beretuz, eta baretuz

ahotsak - barnekoak baina gorgarriak-

isiluneak - burua galtzeko bezain isilak-

eta beldurrak logelan nagusi

gorputza geldi

ezinegona buruan

Gauean, 

ametsen zaindariek zaindu naute ondo

leihoak ireki

gaitzez beteriko airea

hemendik urrun

zertarako ordea

biharamunean dena bada errepikatuko

Noizbait, 

ohea guztiz desegitean

ametsen zaindariek 

ospatzekorik gabe

ospa egingo dute

eta orduan dena da akabatuko.