AIORA JAUREGI PAGALDAY

Enborrari hazten zaizkio 

geruzak urtero

izan zena babes dezan

izango denari aurre egin diezaion.

Zure azaleko tolesen artean

duzu gorde iraganaren arrastoa

egur arrailduaren antzera

zure izurrek didate erakutsi

denboraren joanik badela

          eta eskuetatik d o  a   k    i     g     u      l         a

malkarren malkoetan amiltzen den arte.

-Gaur gara haur

bihar hauts-

Baina zuk

zer duzu gorde esku ahurren artean

urak ihesi ez badizu egiten.

Besaulkian kulunkatzen zara

eskuartean hari eta zotzez

zauriak josiz.

          Oro pausatzen da zure eskuetan

          (h)ura 

          hari.

Egunero-egunero

tantaz tanta ureztatzen dituzu liliak

          tentuz

ustelduko diren beldurrez

hilkorrak baitira zinez.

Baina ohartu naiz 

basamortuan oasi bat 

ez izanagatik ere, 

hazten direla liliak

zurrun bezain irmo

loratuz

harea pikorren artean

hazten dira liliak

zurrun 

eta 

irmo. 

Inork inoiz inola aurki ditzan

eta esan diezaien,  

tolesak tolestuz,

zirrikituetatik

jaiotzen direla benetako liliak.