MAREN ITURRIOZ ETXEBERRIA

DENBORARI BEGIRA

DOINUA: “Langile baten semea naiz ni

1. Egunak nahiz eta hogeita lau

ordu izan berez

guretzat libre direnak gutxi

dira zoritxarrez

denborak muga duenez

hala uste dut tamalez

besteentzako badaukagula

norberarentzat ez

2. Eskolan beti egon behar adi

langile ta trebe

extra-eskolarrek ere badute

nahikoa botere

eginbeharren titere

ez al gabiltza xelebre

ez baitaukagu tarte haundirik

aspertzeko ere

3. Derrigortuta egindakoak

bazterrera utzi

eta gustatzen zaigunetara

egin azkar jauzi

maite ditugunei eutsi,

ikasi ta erakutsi

egiten asko dakigu baina

disfrutatzen gutxi

4. Denborarik ez daukagula ta

bihotza taupaka

behar bezala ezin ikusi

bizitzaren mapa

ustez goaz aurreraka

ai baina a zer aldapa:

erlojuari begira beti

ta beti presaka

5. Mugikorrari ta pantailari 

lotuta zeharo

ondoan izan gabe sentitzen 

baikara arraro

esan beharrean nago

begiratu beharra dago

kanpokaldera gutxiago ta 

barrura gehiago

6. Zoriontasuna aurki dezagun

gauza txikiekin

ilusioa eta ametsak

sentitu gurekin

adiskide, lagunekin

ta familiakoekin

nahi ditugunak egiten eta

nahi ditugunekin