AMETS ZUBIZARRETA ETXANIZ
ZAKUR ALA OTSO?
DOINUA: Aita izena kanta beharrak
Lehertuta nago beste egun bat
ia deskantsatu gabe
neguan ilargia delako
otso guztiontzat jabe
jana ere urria izaten da
ene tripa dago grabe
soluzio bat okurritzen zait
nahiz ta zaila den hala ere
aurkitu nahi dut Txanogorritxu
berriz ere parez pare.
Beste egun bat aurrera doa
tripak jarraitzen du hutsik
janari bila nenbilenean
atera da sasi artetik
hortxe ikusi dut nere aurrean
eta gelditu naiz muturik.
Txanogorritxu agertu baita
kate batekin eskutik
babesten duen zakur bat dauka
jada ez du nire beldurrik.
Zakurrek eta otsook daukagu
bastante antzeko traza
nahiz eta tartean badauzkagun
bereizteko hainbat arraza
zakur ez dezu azkenaldian
nik beste goserik pasa
deskantsatu egiten dezu eta
bizia duzu jolasa
nola bihur dezaket nerea
zurea bezain erraza.
Otso zaharkitu egin zera
ni naiz zakur modernoa
orain lagundu egiten degu
babesteko naiz jaioa
egunerokoan erraz ditut
jana eta lo goxoa
maitasuna ere ematen didate
eskainiz haien altzoa
gure etxera etor zaitezke
hau baduzu desioa.
Kontatzen duzun bizitza oso
polita eta ona da
oso gustura joango nintzen
ni jabearen sofara
eta ze gustura hartu jabeak
emandako besarkada
baina harritu naiz kate bat duzu
lepotik zintzilik hara!
otsoak askatasun guztian
bizitzeko jaio gara
Erosotasunean jarrita
bizitza erreza daukazu
baina konturatu gabe jasan
dituzu hainbat abusu
bihotzetik esaten dizut nik
entzun zaidazu lehengusu
nahiz eta eduki ditzakezun
hainbat muxu eta luxu
erosotasunaren kartzelan
askatasuna ahaztu duzu.
