- Xehetasunak
Uztailaren 1etik 10era izango dira Lekarozko Baztan aterpetxean
Martxoaren 15ean irekiko da izena emateko epea eta plazak bete arte egongo da zabalik. 2011 eta 2015 bitartean jaiotako 50 haurrentzako lekua dago eta beasaindarrek lehentasuna izango dute
Euskararen jakintza eta erabilera aisiarekin lotuta bultzatzea helburu duten udalekuak aurten uztailaren 1etik 10era izango dira. Lekarozko (Nafarroa) “Valle de Baztan” Gazte-aterpetxean burutuko da egonaldia. Udan, euskara hobetu, erabilera indartu eta naturaz gozatzeko aukera ederra eskaintzen du honela Beasaingo Udalak eta bide batez ere eskolen opor garaian familien kontziliaziorako lagungarria izango den zerbitzua izatea nahi du.
Beasaingo Udalak, haurren artean euskararen jakintza eta erabilera indartzeko helburuari tinko eutsiz jarraitzen du. Gure hizkuntzaren sustapena aisiarekin lotu nahian eta giro euskaldun batean natur ingurunean txertatutako eremu bat aukeratuta antolatu ditu aurten ere euskarazko udalekuak. Egitasmo hau, udal gobernuaren legealdi planean helburu nagusien artean jasota eta iragarrita agertzen da eta konpromiso hori betez gauzatu du.
Euskaraz naturaz gozatu
Euskara, natura eta aisia oinarritzat dituen egitarauarekin antolatutako udalekuak Baztango Lekaroz herriko “Valle de Baztan” gazte-aterpetxean burutuko dira, natur-ingurune paregabean. Hamar eguneko iraupena izango dute eta 2011 eta 2015 bitartean jaiotako haurrek parte hartu ahal izango dute.
Plaza kopurua mugatua da. 50 haurrentzako lekua izango da eta izena emateko epea martxoaren 15ean irekiko da. Helbide honetan aurkitzen den galdetegia betez izena eman beharko da. Plazak bete arte zabalik egongo da izen-ematea eta haur beasaindarrei emango zaie lehentasuna.
Prezioak
Prezioak hauek dira: seme-alaba bat 150 euro; 2 seme-alaba 255 euro. Familia ugarien kasuan: seme-alaba bat 120 euro; bi seme-alaba 225 euro; hiru seme-alaba 300 euro.
Informazio gehiagorako Beasaingo Udalera jo ahal da telefono zenbaki honetara deituz 943 028063 edo Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. era idatziz.
- Xehetasunak
Lizar Begoña Madariagak “Mundu zitalaren kontra” liburua aurkeztu du Igartzan eta aldi berean, Igartza Literatur Sorkuntzako Bekaren 27garren edizioan idazle gazteei parte hartzeko deia zabaldu zaie. Diru-saria 6.000 euro izatetik 10.000 euro izatera pasa da
Idazle gazteen XXV. Igartza Literatur-sorkuntzako bekaren lan irabazleak argia ikusi du. 2022an “Itzalkinak eguzkitan” izenarekin saritua izan zen proiektua, garatu, landu eta ondu ostean, “Mundu zitalaren kontra” titulupean aurkeztu du Lizar Begoña Madariagak; goizean Donostiako Elkar argitaletxearen egoitzan eta arratsaldean Beasaingo Igartzako jauregian.
Idazle gazteei zuzendutako Igartza Literatur Sorkuntzako Beka Sariari esker ondutako lehenengo eleberria da egile sopelarrarentzat. Kontakizunean Benidormen kokatu ditu bi belaunaldi ezberdinetako bi emakume; bertakoa bata eta bizkaitarra bestea. Bien egunerokotasuna isladatzen da eleberrian. Kontakizunaren inspirazioa edo jatorria, Martin Parr argazkilariak Benidormi buruzko argazki segida bat izan zela esan du eta liburuaren azala Ainara Alkortak ere horretan inspiratuta egin du.
Liburuaren aurkezpenean idazle sarituaz gain, Beasaingo alkatea Leire Artola, Elkar argitaletxeko arduraduna Xabier Mendiguren eta CAF enpresako euskara arduraduna Bianditz Iraola izan dira.
Aurkezpenean, Artola alkateak, bekaren garrantzia eta balioa azpimarratu du. “Beasaingo Udalak kultur proiektu anitz aurrera eramaten baditu ere, beka altxor bat da. Beasain euskal mapan kokatu du eta euskal literatur sorkuntzaren erreferentea da”. Alez ale uzta oparoa dela gaineratu zuen helburu argi eta zehatz batekin; “sormena eta euskara batuz, gure hizkuntza hilezkor izaten laguntzea”.
XXVII. ediziora aurkezteko deia
Beasaingo Udalak, Beasaingo CAF (Construcciones y Auxiliar de Ferrocarriles) enpresaren babesarekin eta ELKAR argitaletxearen laguntzarekin, euskal kultura zabaldu eta idazle gazteen lanari laguntza emateko asmoz sortutako beka da hau. Idazle gazteentzako aurtengo Igartza Literatura Sorkuntzarako Bekak irekita dauka proiektuak jasotzeko epea. Oinarriak Udalbatza osoaren oniritzia jaso eta argitaratu ostean, idazle gazteek ekainaren 30era arte dute euren proiektuak aurkezteko epea.
XXVII. edizioan parte hartzeko baldintza nagusiak hauek dira: 35 urte bete gabe izatea, aurretik lan argitaraturik izatekotan helduentzako bi liburu baino gehiago ez izatea, aurreko edizioetako Igartza Beka sariaren titularra ez izatea, narratibako lanak izatea -eleberria edo ipuin-bildumak- eta lanak jatorrizkoak eta euskaraz sortuak izatea.
Diru-saria hazi da
Edizio honetarako epaimahaia Irati Jimenez Uriartek, Garazi Kamio Anduagak eta Olatz Mitxelena Larretak osatuko dute. Proiektuak aurkezteko udaletxeko sarrera erregistro ofizialean Igunean edo on line erregistro elektronikoa erabiliz www.beasain.eus helbidean egin beharko da. Jasotako proiektu guztiak aztertu eta haien artean irabazlea zein den epaimahaiak erabakiko du 2024ko irailean. Edizio honetan bekaren saria 6.000 eurotik 10.000 eurora hazi da. Urteetan sariaren kopurua bere horretan mantendu da, baina aurten beka-sari hau antolatzen eta babesten duten hiru aldeek adostasunez, kopurua haztea erabaki dute.
Igartza literatura bekak bi hitzordu nagusi izaten ditu urtean; bata liburu irabazleak argia ikusten duenean eta bestea bekaren irabazlea jakinarazten denean. Izan ere bekaren irabazlea jakitean honek ia urtebeteko epea izaten du proiektua garatu eta ontzeko. Une honetan lantze eta ontze bidean dago Irati Irizar Alvarezen "Ilargi kutsadura" proiektua, XXVI. edizioko irabazlea.
Euskal kultura eta euskaraz irakurtzeko ohitura hedatzeko asmoz aurkeztu da irakurzaletasun kanpaina
- Xehetasunak
Irakurzaletasuna herritarren artean zabaltzeko aurtengo kanpaina aurkeztu dute udal ordezkariek
Haurrak, gazteak, helduak, familiak eta hezitzaileak kontuan hartuz, ipuin kontaketak, irakurle taldeak, hitzaldiak, liburu aurkezpenak eta solasaldiak biltzen dituen egitaraua ondu dute
Udal bibliotekaren eskutik, Beasaingo Udalak herritarren artean irakurzaletasuna sustatzeko kanpainak pdf egitarau (525 KB) zabala antolatu du aurten ere. Urtez urte, sendotu eta egonkortu den kanpaina honek kultura eta irakurzaletasuna sustatzeko konpromisoari eusten dio.
Udal bibliotekan egindako aurkezpenean, Mariola Pascual kultura zinegotzia eta Herritarren arloko buruak, Rebeka Piñeiro bibliotekako arduradunak eta Ane Barandiaran euskara teknikariak, kanpainaren nondik norakoak azaldu dituzte antolatu diren ekitaldien egitarauarekin batera.
Helburu nagusiak
“Ireki liburuak begiak irekitzeko” leloari eutsiz, Mariola Pascualek irakurketak egungo gizartearen ikuspegi zabalagoa garatzeko duen garrantzia azpimarratu nahi dela azaldu du. Udal bibliotekak bultzatuta, hainbat ekintza eta egitasmo antolatu dira helburu nagusiak ondorengoak izanik: euskal kultura sustatzea, euskaraz irakurtzeko ohitura indartzea eta bidenabar euskarazko literatura ezagutaraztea. Baita ere udal liburutegiaren dinamikak herritarren kultur beharretara egokitzea. Gai sozialak lantzea eta eskaintza anitza izatea eta ekintza eta egitasmo ezberdinak antolatzea, bai banakakoak bai taldekakoak.
Adin guztientzako egitaraua
Osatu den egitaraua, martxoaren 7tik apirilaren 30era luzatuko da eta guztira egitaraua osatzeko 16 ekitaldi antolatu dira, denak irakurzaletasunaren inguruan. Horretarako hainbat formatu erabili dira haurrak, gazteak, helduak, familiak, hezitzaileak kontuan hartuko dituenak. Esaterako , ipuin kontaketak, irakurle taldeak, hitzaldiak, liburu aurkezpenak eta solasaldiak.
Irakurle taldeen garrantzia
Ane Barandiarenen hitzetan, aurtengo egitarauan irakurle taldeek presentzia garrantzitsua izaten jarraituko dute. Izan ere, iazko haur eta familientzako irakurketa kluba aurten bi taldeetan banatu behar izan da eta, orotara, 26 familia inguruk parte hartzen dute bertan. Hilabetean behin biltzen dira Udal liburutegian, irailean hasita eta maiatzera arte.
Horretaz gain, Beasaingo helduen ohiko irakurle taldeak ere aurrera jarraitzen du, Aintzane Usandizaga idazlearen gidaritzapean. Talde hau ere Udal liburutegian biltzen da hilabetean behin, asteazken batean, urritik ekainera arte. Kasu honetan, interesa dutenek saio solteetan ere parte hartu ahal izango dute.
Irakurle taldeei dagokionez, beste bi irakurle talde aipatu nahi izan ditu Barandiaranek: alde batetik, Urbi berriko egoitza sozialeko taldea, iaz osatu eta oraindik martxan dirauena (bertako kideak euren instalazioetan biltzen dira ostegunetan), eta bestetik, ASMUBEko (Beasaingo Emakumeen Elkartea) irakurle talde feminista. Hau da, botere-harremanak eta genero-estereotipoak zalantzan jartzen dituzte eta parte-hartzaileek beren bizitzetako hainbat alderdiri buruzko hausnarketak egiten dituzte. Aurten talde honek dinamizatzaile berri bat du: Sandra Agúndez eta ASMUBEko bulegoetan elkartzen dira.
Beasain idazle gazteen harrobi
Horiez gain, Barandiaranek denboraren poderioz egonkortuta dauden bi egitasmoetan azpimarra egin du emaitza oparoa eman dutenak.
Alde batetik, idazle gazteentzako Igartza literatur beka-saria. Jakin, martxoaren 13an aurkeztuko dela 25. edizioko irabazlea izan zen liburua, Lizar Begoñaren “Mundu Zitalaren kontra” eta dagoeneko martxan dagoela 27. edizioa ere. Ekainaren 30a arte izango dute proiektuak aurkezteko aukera.
Eta bestetik, “Beasaingo idazlehiaketa”. 34 urtez, urtetik urtera Beasaingo eta Goierriko haur eta gaztetxoek parte hartzen duten idazlan lehiaketa. Bertan prosa, poesia eta bertsoak saritzen dira. Dagoeneko lanak entregatuta dituzte eta apirilaren 20an banatuko dira sariak.
Emozioen lanketa eta ekintza berriak
Rebeka Piñeiro udal liburutegiko arduradunak aipatutako ohiko ekintza guzti hauetaz gain, aurtengo egitarauan sartu dituzten ekintza berriez aparte, iazko “Emozioen saltsa” lantegiaren jarraipena iragarri du. Saio hauetan, haur eta gazteek literatura bidelagun dutela, emozioen aferarekin topatzen dituzten zailtasunen inguruan hausnartzen dute. Iaz batez ere, hezitzaile, guraso eta irakasleek parte hartu zuten, baina edonori zuzendutako tailerra da. Bideratzailea Mireia Delgado Exposito da eta emaitzak onak izan zirela kontuan hartuta, beste bi saioa gehiago eskaintzea egoki ikusi da. Horietako bat apirilaren 30ean izango da, eta bestea maiatzaren 28an.
Bestalde, aurtengo egitarauan hiru ekintza berri azpimarratu ditu bibliotekako arduradunak:
Lehenengoa liburu trailer lehiaketa da. Martxoaren 8a abiapuntu gisa hartuta, feminismoa, tratu onak eta bizikidetza lantzen dituen bibliografia proposatu dute.
Liburu hauek lantzeko, bi kategoria aurreikusi dituzte; bat 12 urtetik gorako haurrei zuzenduta eta bestea 12 urtetik gorako gazteentzat. Banaka edo taldeka liburu bat aukeratu eta gehienez 3 minutuko iraupena duen bideo bat sortu beharko dute. Bideo horretan, testua, ahotsa, musika eta, oro har, irudimena erabili beharko dute. Bideoak Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. posta elektronikora bidali beharko dituzte, apirilaren 17a baino lehen. Sari banaketa, apirilaren 23an izango da, Nazioarteko Liburuaren Egunaren bueltan eta bi kategoria daudenez, bi sari ere badaude:
12 urtetik beherako partaideen artean, irabazlearentzat edo irabazleentzat, Beasaingo saltoki txikietan gastatzeko 80 euroko balioa duen bonua emango zaie. Horretaz gain, aipamen berezia jasoko duen bigarren saria ere egongo da eta honi edo hauei Beasaingo saltoki txikietan gastatzeko 50 euroko balio duen bonua egokituko zaie.
12 urtetik gorakoen kasuan, berriz, lehenengo saria 100 euroko bonua litzateke, aurrekoek bezala, Beasaingo saltoki txikietan gastatzeko. Aldiz, aipamen berezia jasotzen dutenei 80 euroko bonua egokituko zaie. Haur eta gazteak, parte hartzera animatu dituzte.
Bigarren ekintza berria, “Azken galdera amari” ipuinaren aurkezpena da, Manex Beristainen eskutik. Liburu honen berezitasuna da heriotza eta dolua lantzen dituela. 9 urteko ume bat da ipuinaren protagonista eta sentiberatasun osoz bere amaren heriotzaren aurrean egindako prozesuaz mintzo da. Egilearen esperientzia pertsonalean oinarrituta dago. Euskal Herriko hainbat liburutegietan eta kultur etxeetan oso harrera ona izan du. Aurkezpena Udal liburutegian izango da eta kasu honetan, 5 urtetik gorako haurrei zuzenduta dago, beti ere heldu baten laguntzarekin.
Ekintza berrien artean ere “Gora Euskal Herrientsak” saiakera grafikoaren aurkezpena izango da, Igartzako jauregian, apirilaren 17an. Kasu honetan egilea, Asisko Urmeneta Otsoa, Beasainen izango da. Edonola ere, aipatu nahi dugu lan honetan Asiskok Dom Campistron ilustratzailearen laguntza izan duela. Berak barruko mapa eta 1924ko manifestua ilustratu ditu.
Liburu honek kulturaren transmisioan aitzindariak izan ziren 5 errientsaz edo eskola maistraz mintzo da. Era berean, Emakume Abertzale Batza, Begiraleak eta Euskal Eskolak gauzatu zituzten maistra kontziente eta herrizaleen lana aldarrikatzen du.
Komikiaz baliatuz, Asiskok Euskal Herriaren memoria historikoa berreskuratzeko dokumentazio lan bikaina egin du. Hartara, ez da harritzekoa arrazoi hauengatik eta gehiago Central Comics (Portugalgo komiki atal digitalak) bere lana saritu izana.
Ekitaldi guztiak euskaraz eta doan
Amaitzeko, Mariola Pascualek gogoratu du ekintza guztiak doakoak eta euskaraz izango direla eta hauetako batzuetan parte hartzeko, aldez aurretik liburutegian izena eman beharko dela. Eskerrak emanez, jende guztia ekitaldietan parte hartzera animatu ditu.
- Xehetasunak
Beasain eta batez ere gaztetxo beasaindarrak euskalduntzeko ekimen berria dakar Udalak Goierri Telebistaren bitartez herriko ikastetxeen parte hartzearekin, “Kantari Beasain”. Zortzi eta hamabi urte bitarteko 275 neska-mutiko beasaindarrek parte hartuko dute kulturgintza eta euskalduntzea helburu duen saioan.
Beasaingo Udalak bere helburu eta ardatzetako bat du euskararen ezagutza eta erabilera sustatzea eta proposamen berri honekin, ahalegin horretan indar egiten jarraitu nahi du. Leire Artola alkatearen hitzetan, “Kezkatik baño arduratik ikusten dugu euskararen erabilera ahalik gehien zabaltzearena. Euskara erakargarri izatea behar du euskaldunon egiteko behinena eta gazteen artean egin nahi dugun ahalegin horretan kokatzen dugu ekimen hau”.
Ekimenarekin bat egin dute Beasaingo lau ikastetxeek ere: Murumendi eskolak, Andramendi ikastolak, Alkartasuna Lizeoak eta La Salle Beasain ikastetxeak. Ikastetxetik kanpo ere, aisialdian, helburuak bete eta euskaraz jarduteko aitzakia badelako guraso eta gaztetxoentzako dinamika hau.
Hori horrela, helburuak nola beteko diren adierazi du Leire Artola Alkateak: “Euskara modu dibertigarrian erakargarri bihurtuz eta bide batez euskal kantugintza eta kultura gazteei helaraziz. Aldi berean, gurasoak euskal kulturara ere erakartzen ditugu kate honetan, ondo pasatuz eta euskara gozamenarekin lotuz. Goierri telebistaren proposamenari baiezkoa emanda, herriko ikastetxeen laguntza eta elkarlana eskertu beharrean gaude. Kantari saioa finean, euskarara modu dibertigarrian gaztetxoak erakartzeko modua da, haur eta gazteak euskaraz kantuan eta dantzan jartzen dituen ikuskizuna da, gazteak eurak ikuskizuneko protagonistak bihurtuz”.
Emanaldiak otsailaren 24a, larunbata, eta otsailaren 25a, igandea, egingo dira Usurbe Antzokian. Guztira 11 emanaldi egingo dira eta herritarrek zuzenean emanaldiez gozatzeko aukera izango dute. Doakoak izango dira emanaldi guztiak eta ez da ez sarrera ez gonbidapenik behar izango.
Horretaz gain, Goierri telebistako zuzendariak adierazi duen bezala, “zuzenean streaming bitartez ere jarraitu ahal izango dira emanaldi guztiak. Larunbatean, 15:00etatik aurrera eta igandean, aldiz, goizeko 11:00etatik aurrera, ‘gitb.eus’ atarian. Zuzeneko emanaldiak eta gero, webgunera ere igoko dira saioak eta gurasoei ere bidaliko zaie saioaren lotura zuzena”.
Astero bi saio estreinatuko dira telebistan, asteartetan eta ostegunetan, 21:00etan. Asteburuetan errepikatuko dira.
