KIMETZ FURUNDARENA AGIRRE
BELAUNALDIEN ARTEKO TALKAK
1. Nire aitonak kontatu zidan
eskolan bizitakoa,
lezioa ez ikastearren
jasotako eskukoa,
denen aurrean lotsaraztea
izaten zen ohikoa
eta etxera joan ondoren
gurasoen zartakoa.
2. Beraiek guraso bihurtzean
saiatu ziren hobetzen,
diziplina ta mugak bai baina
gauzak hobeto azaltzen.
Irakasleen ta gurasoen
esanak ongi betetzen,
gogorkeria askorik gabe
esanak errespetatzen.
3. Errespetuz eta ez beldurrez
erakusten jakiteko,
guraso eta irakasleak
ibiltzen ziren pareko.
Mugak jartze hori ez zen izan
haurrei kalte egiteko,
baizik beraien bizitzarako
prest egoten laguntzeko.
4. Gaur etxe askotan ikusten da
guzti hura desegiten,
guraso askok seme-alabak
diziplina gabe hezten.
Ordutegi, jarrera ta arau
beraien eskutan uzten,
eskubideen zakua bete,
betebeharrena husten.
5. Gaur eskolan, atseden orduan
izan dugu zalaparta,
futbolean gelakide batek
eman dit kristoren zarta.
Maisuak kanporatu egin du
ta alde egin du marmarka,
Gurasoek jakitean, berriz,
jaso du babes aparta.
6. Gurasoek galdu ote dute
hezkuntzan zuten papera?
Hezitzailea eta laguna
ez da figura berbera.
Garrantzitsua da aurkitzea
arazo honen irteera,
hobeto bizi ahal izateko
gizarte hontan batera.
DOINUA: Txiki-txikitik aitak eta amak
