DUNA URTEAGA JAUREGI
OINATZAK
Hitzak pertsona txikiak dira,
buruan zehar tipi-tapa ibiltzen direnak.
Batzuek energia gutxi dute,
eta tipi-tapa berehala nekatzen dira.
Baina badira energia asko dutenak ere,
eta tipi-tapa badirudi inoiz ez direla nekatuko.
Eta han doaz buruan zehar tipi-tapa,
zapaldutako leku orotan oinatzak utziz.
Eta hitzek tipi-tapa jarraitzen duten bitartean,
tipi-tapa pentsatzeari ezin utzi.
Pentsatzearekin batera, tipi-tapa,
hitzak indartuz doaz,
berriro ere tipi-tapa oinez jarraitzeko.
Beraz, han doaz tipi-tapa oinez,
buruan zehar milaka hitz,
tipi-tapa oinatzak utziz.
Eta tipi-tapa jarraitzen dute,
badirudi inoiz ez direla nekatuko.
Burua berriz jada nekatu da,
tipi-tapa hitzak soinean oinez eramateaz.
Baina hitzek, tipi-tapa, oinatzak utziz jarraitzen dute.
Eta tipi-tapa oinatzak min egiten hasten dira,
tipi-tapa, oinatzak oinaze bihurtu arte.
Izan ere badira oinatza oinaze bihurtu arte,
tipi-tapa jarraitzen duten hitzak ere.