- Xehetasunak
Udalak onartutako laguntzak Covid 19aren ondorioz kaltetutako ostalariei, merkatariei eta zerbitzu alorreko negozioei zuzenduta daude
Eskaerak aurtengo uztailaren 19tik irailaren 15era bitartean aurkeztu ahal izango dira zaborren kasuan soilik, terrazenak zuzenean ezarriko dira
Beasaingo Udalak, pandemiak eragindako kalteak arintzeko xedez, udalerriko ostalariei, merkatariei eta zerbitzu alorreko negozioetako jabeei zuzendutako laguntzen artean zabor eta terrazetako tasetan hobariak ematea erabaki zuen.
Hori horrela, Covid 19ak eragindako osasun-krisiaren ondorioz jarduera murriztua izan duten ostalaritza, merkataritza eta zerbitzu sektoreetako jabeei zuzendutako laguntzak eskatzeko epea irekiko da datorren astean. Hain zuzen ere, jasandako galerei aurre egin ahal izateko, kaltetutek zabor eta terrazetako tasak ez dituzte ordaindu behar izango 6 hilabetez.
Osasun-krisialdian bizi izan diren perimetro-itxieren ondorioz bereziki kaltetutako kolektiboa izanik, urteko zabor eta terrazen tasen %50eko hobaria ezartzean datza laguntza honek eta 2. seihilekoari dagokion ordainketa epean gauzatuko da. Terrazen tasaren gaineko hobaria zergadun guztiei aplikatuko zaie zuzenean, beraz eskaera zaborraren tasarako bakarrik egin beharko da.
Hobaria jaso nahi dutenek aurrez eskabidea egin beharko dute. Hori egiteko epea uztailaren 19an hasi eta irailaren 15era arte luzatuko da eta Beasaingo Udaleko Igunera, herritarren informazio eta arreta bulegora, jo beharko dute edo udalaren web orrialdeko bulego birtualaren atalera.
Eskabidea egiteko garaian pdf eskaera orria (38 KB) bete eta bertan eskatzen den dokumentazioa erantsi beharko da, besteak beste jardueraren titularraren NAN edo IFKren fotokopia eta jarduera alokatutako lokal batean egiten bada hori ziurtatzen duen dokumentua.
- Xehetasunak
Orotara covid 19az kutsatutako zortzi positibo kasu atzeman dira eta apirilaren 10a arte itxita egongo da protokoloak agintzen duenaren arabera
Joan den astean ezagutu zen Covid 19az kutsatutako positibo kasu baten ondorioz, Loinatz eguneko zentroan baheketa orokorra egin zen erabiltzaile eta langile guztien artean. Horren emaitza; zazpi erabiltzailek eta langile batek positibo eman zuten, hain zuzen ere txertoaren bigarren dosia hartzeko faltan zeudenak.
Honen aurrean eta osasun agintaritzak ezarritako protokoloa jarraituz Loinatz eguneko zentroa itxita dago joan den larunbataz geroztik eta apirilaren 10a arte ez da irekiko. Gaur egun Loinatz eguneko zentroak astean zehar hemezortzi pertsonei arreta ematen die eta asteburuetan aldiz hamarrei.
- Xehetasunak
Osasuna babesteko prebentzio neurriak gordez ekimena apirilaren 15ean berrekitea aurreikusi da eta kiroldegian eman beharko da izena
Zahartze aktiborako, helduen sozializaziorako eta orohar adineko pertsonen osasunean duen eragin onuragarriak kontutan hartuta Ondo ibili ondo izan ekimenean parte hartzen duten eragile guztiek ekimenari berriro heltzea erabaki dute.
Duela urtebete Covid 19ak eragindako konfinamentua eta pandemiaren eraginez bertan behera geratu ziren ostegunero burutzen ziren ibilaldi osasuntsuak eta ohitura hau berreskuratzeko erabakia hartu da. Hori bai, gauden testuingurua ikusirik beharrezkoak diren babes neurriak beteko dira. Horretarako pertsona kopuru mugatuko taldeak osatuko dira bakoitzaren baldintza eta egoerari erreparatuz.
Horretarako, antolaketa egokia burutu ahal izateko parte hartzeko desioz zeuden pertsonek izena eman beharko dute Antzizar kiroldegira deituz 943 887900, edo bertaratuz. Ondo bidean, apirilaren 15ean hasiko dira ibilaldiak.
Sozializazioa eta osasun fisikoa
Gaur egindako aurkezpenean, Leire Artola alkatea, Elena Ruiz kirol zinegotzia, kiroldegiko teknikariak eta parte hartzen duten elkarte ezberdinetako ordezkariak izan dira; hala nola, Beasaingo osasun etxea, Asmube, Aranealde, Nagusilan, eta Aita Menni. Azken hauek Aldundiak esanda ez dute parte hartuko oraingoz.
Ekimenak pertsona helduentzat duen garrantzia azpimarratu dute denek. Ariketa fisikoak onura asko ekartzen dizkio osasunari arlo guztietan eta batez ere gaixotasunak prebenitzeko garaian. Gainera, indarra eta giharretako erresistentzia hobetu eta artikulazioak gazte mantentzen ditu, oreka hobetu eta erorikoen arriskua gutxitzen du, loaren kalitatea eta humorea hobetzen ditu eta tentsioak askatzen laguntzen du.
Ez hori bakarrik, denbora tarte atsegin bat igarotzeaz gain harremanak eta sozializazioa ere lantzen dira eta bakardadeari aurre egiteko ezinbesteko ekimena da.
- Xehetasunak
Dirulaguntzak banatzeko oinarriak behin argitaratuta eskaerak elektronikoki edo udaletxean egin daitezke
Udalerriko merkataritza, ostalaritza eta zerbitzuetako sektoreak suspertzeko udal-laguntzei buruzko oinarriak argitaratuta eskaerak egiteko epea irekita dago. Honela eta Covid 19ak eragindako pandemiaren ondorioz, Beasain eremu gorrian egoteagatik establezimenduak ixtera behartu dituzten ostalariek eskaerak bideratu ditzakete.
Eremu gorrian egoteagatik itxita egon diren negozioei
Pandemiaren eraginez udalerriko ostalaritzako aktibitatea itxita egon den hilabete bakoitzeko (osoa ez dena proportzioan) langileen arabera dirulaguntza hauek jaso daitezke: 1.000 euro langile bat, bi edo hiru dituzten aktibitateentzat. 1.200 euro lau, bost edo sei langile dituzten aktibitateentzat eta 1.400 euro 7 langile edo gehiago dituzten aktibitateentzat.
Udalak 150.000 euroko kreditua aurreikusi du laguntza hauetarako. Dirulaguntza honetarako emango den gehienezko kopurua establezimendu bakoitzeko 3.000 eurokoa izango da. Eskaerak egiteko epea maiatzaren 30a arte dago irekita.
Merkatal sektorea biziberritzeko laguntzak
Udalak merkataritza sustatzeko duen interesaren baitan (batez ere Jose Migel Iturriotz kaleko merkataritza), merkatariei edo saltokia ireki nahi dutenei zuzendatuko laguntzak banatuko ditu. Helburua merkataritza sektorea biziberritzea da, hutsik dauden lokalak martxan jartzeko laguntzak emanez eta eskualdatzen denean negozioen jarraipena bultzatuz.
Lokal huts batean merkataritza-jarduera bat abian jarri den edo martxan dagoen negozioa transmititu nahi duen pertsonak bete behar dituen baldintzak eta betekizunak zehazten dituzte oinarriek.
Establezimendua alokatuz gero, gehienez lehen hiru urteetako alokairu-gastuak diruz ordainduko zaizkio. Lehenengo urtean alokairu gastuaren %50, gehienez ere 300€ hilean. Bigarren eta hirugarren urtean alokairu gastuaren %40, gehienez ere 200€ hilean.
Establezimendua erosiz gero, dirulaguntza Katastroko balioaren %4 izango da, gehienez ere 2.000€. Laguntza hauek iaz jarri ziren martxan eta lau eskaera jaso ziren guztira 9.500 euroko kopurua banatuz.
Lehentasuna Jose Migel Iturriotz kalean hutsik dauden lokalek eta negozioek badute ere udalerrira osora irekita daude laguntzak. Eskaerak egiteko epea urriaren 30a arte dago irekita.
Errotuluak, irudi korporatiboa eta webak euskaraz
Merkataritzan hizkuntza paisaia euskalduntze aldera, eta gaztelaniaz dauden errotulu nagusia eta irudi korporatiboko elementuen kopurua jaiste aldera banatuko diren laguntzak dira.
Errotuluen kasuan, dirulaguntza kostuaren %50 izatea, gehienez ere 240 euro izatea.
Irudi korporatiboen kasuan, testua euskara hutsez jarriz gero, kostuaren %50 ordainduko du Udalak eta dirulaguntza gehienez ere 180 eurokoa izatea.
Web-orria euskara hutsez eginez gero, kostuaren %50 izango da dirulaguntza, eta gehienez ere 450 euro. Web-gunea euskaraz eta beste hizkuntza batean/batzuetan egonez gero, kostuaren %40 izango da dirulaguntza, eta gehienez ere 360 euro. Eskaerak urriaren 1a arte aurkeztu daitezke.
