- Xehetasunak
Datorren asteartean hilak 16, udaletxean egingo diren bileretara daude deituta merkatariak (13:30ean) eta bizilagunak (18:00etan)
Oinezkoen irisgarritasuna eta bide-segurtasuna hobetzeaz gain espazio publiko atseginagoa bilakatuko da, bizilagunei eta merkataritzari espazio zabalagoa eskainiz
Hastear dira Beasaingo erdiguneko arteria nagusietako bat osatzen duten San Inazio eta Esteban Lasa kaleak birgaitzeko lanak. Lan hauek eragina izango dute udalerrian oro har baina zuzenagoa bertako bizilagun eta merkatariengan. Horren jakitun, Udalak egunerokoan bertan bizi eta lan egiten duten herritarrak behar bezala informatu nahi ditu lanek izango duten garapenari buruz eta dauzkaten zalantzak argitu nahi dizkie.
Hori horrela, apirilaren 16rako bi bileran antolatu dira udaletxean. Lehena 13:30ean izango da merkatariekin. Eta bigarrena arratsaldeko 18:00etan bizilagunekin. Proiektua eta lanen nondik norakoak azalduko dituzte udal arduradunek lanak burutuko dituen enpresaren ordezkariekin eta proiektuaren egileekin batera.
San Inazio-Estaben Lasa, denda, saltoki, ikastetxe eta zerbitzu ugari biltzen dituen ardatza da eta pertsonen topaleku eta joan-etorrirako eremua da. San Inazio kalearen garapenak 60. hamarkadan eman zituen lehen pausoak eta Esteban Lasa geroago gehitu zitzaion. Orduz geroztik ez da bertan esku hartzerik burutu eta azaleko konponketak soilik jaso dituenez, agerian gelditu dira urteen poderioz pairatzen dituen gabeziak.
Hargatik, udalerriko beste hainbat kaleetan egin den bezala, ardatz hau egungo behar eta baldintzetara egokitzeko erabakia hartu zuen udal gobernuak, oinezkoei egokitutako espazioak lehenetsiz eta bertako merkataritza eta saltokiak indartzeko konpromisoarekin jarraituz. Bide segurtasuna hobetzeaz gain lurpeko lanak ere burutuko dira zerbitzu eta ur-saneamendurako sareak berrituz.
Otsaileko osoko bilkuran erabaki zen San Inazio eta Esteban Lasa kaleak berrurbanizatzeko proiektuko obrak esleitzeko proposamena. Construcciones Otegui-Gaztañaga S.L. enpresak burutuko ditu lanak 2.548.960,64 euroan (BEZ barne).
- Xehetasunak
Zuhaitz eguneko landaketan parte hartu dute herriko lau ikastetxeetako ikasleak udal ordezkariekin batera
Ingurumena babestu eta zaintzeko helburuak duen garrantzia zabaltzeko konpromisoarekin lotuta dagoen ekitaldia errepikatu dute udal ordezkariek herriko ikasleekin. Murumendi Eskola, La Salle, Andramendi ikastola eta Alkartasuna Lizeoko ikasleekin burutu dute zuhaitz landaketa Leire Artola alkateak eta Adur Ugartemendia alkateordeak. Udalak Beasaingo gazteengan eragin nahi du ingurumenarekiko sentsibilizazio eta errespetuan sakontzeko. Era berean, ekimen honekin Garapen Jasangarriko helburu hauek betetzen dira; hiri eta komunitate jasangarriak sustatzea eta klimaren aldeko ekintza eta lehorreko ekosistemetako bizitzan eragitea.
Hori horrela, aurten ere Sagastiguti parkea aukeratu da zuhaitz landaketa egiteko. Guztira, ikasle adina zuhaitz landatu dituzte Beasaingo herri-gunetik gertu dagoen aisialdirako gune berde honetan, orotara 23 urki. Ikasle gehienak lehen hezkuntzakoak izan dira.
Udal zerbitzuetako arduradun eta langileek lagunduta, ikasleek banan banan kokatu dituzte aldez aurretik egindako zuloetan zuhaitzak. Zuhaitz egunaren baitan burututako ekimenarekin gaztetxoak natura babestu eta zaintzeak duen garrantziaz kontzientziatu nahi dira. Ingurune berde eta zainduak sortu eta mantentzea du helburu Udalak eta horretan eragin du gaurko zuhaitz landaketak.
Ekimena hasi aurretik, alkateak ingurugiroa eta honen babesa egungo eta etorkizuneko erronka direla adierazi du. Izan ere, Klima Aldaketaren ondorioek bereziki eragingo die datozen belaunaldiei eta ezinbestekoa suertatzen da gaurtik pauso irmoak ematen hastea. Legealdi planaren ardatz nagusietako bat izanda, Udalak lanean jarraitzen du berebiziko garrantzia duen gai honi lotutako ekimenak aurrera eramanaz. Besteak beste, datozen urteetako proiektu eta esku-hartzeak egituratuko dituen Energia eta Klima Aldaketaren Aurkako plana. Horretaz gain, aurtengoan, ibaien garbiketa eta landare espezie inbaditzaileen erauzketa proiekturari jarraipena emango zaio.
- Xehetasunak
Azoka eta bertako produktuen onurak ikasleei ezagutarazteko helburuarekin jarraituz, azokako bi ekoizleen lantegiak ezagutzen izan dira aurreko asteetan
Larunbat honetako azoka berezian ilarra eta babak izango dira nobedade nagusiak eta Beñat Telleriak gazta nola egin irakatsiko du. Azokako bonuak ere salgai izango dira
Bertako eta garaian garaiko produktuak eskuratzeko hileko lehen larunbateko azoka apirilaren 6an itzuliko da. Negu sasoiko elikagaien eskaintza nagusi izaten jarraituko du eta nobedade nagusiak ilarra eta babak izango dira. Horiez gain, azelgak, letxugak eta azak ere euren tokia izango dute postuetan.
Ziur honen berri badakitela herriko ikastetxeetako ikasleak. Izan ere, otsailean eta martxoan, Beasaingo Udalak, herriko ikastetxeekin eta Osakidetzarekin batera aurrera daramaten ekimenei esker azokako bi ekoizleen txokoak ezagutu zituzten eta elikagaiak nola ekoizten dituzten ikusten eta ikasten izan ziren.
Elikadura osasuntsuaren garrantzia
Bertako azoka eta produktuak ezagutarazi nahian eta azoka ingurura hurbiltzen den sarea handitzeko asmoz batetik, eta bestetik, Eskolako Agenda 2030eko proiektuaren baitan, azokan saltzen diren bertako produktuek elikadura osasuntsuarekin duten lotura estua azaldu nahian hainbat ekimen burutuko dira aurten. Dagoeneko horietako batzuk burutu dira.
Osakidetzak, BPSO programaren bitartez, haurren obesitatearen programan oinarrituta Beasaingo ikastetxeetako LH6.mailako ikasleei gosari osasuntsuak egiten ikasteko tailerrak eskaini zizkien eta gurasoei ere zuzendutako saioak eman zituen.
Bestalde, Amaia Aierbe nutrizionista bidelagun zela, ikasleek larunbateko azokako bi ekoizleen txokoak eta horien lana bertatik bertara ezagutu dute. Hain zuzen ere, ikasleak Josetxo Mendiaren Altzibar baserriko baratzean eta Beñat Telleriaren Odio baserriko gaztandegian izan ziren otsailean eta martxoan eta bertako nondik norakoak ezagutzeaz gain, Josetxoren baratzean letxugak landatu eta Beñaten gaztandegia ikusi eta bere txahalak ezagutzeko aukera izan zuten. Alkartasuna Lizeoa, Andramendi ikastola, La Salle eta Murumendi eskolako LH6.mailako ikasleek partu hartu zuten irteera hauetan.
Beasaingo azoka eta bertako ekoizleak balioan jartzeko helburu hau elikadura eta kontsumo ohiturekin lotzen da. Belaunaldi berriek, elikatzeko ohitura osasuntsuak barneratu ditzaten, bertako eta garaian garaiko produktuak ezagutuz eta lehenetsiz.
Gazta nola egin
Honi lotuta aipatu larunbat honetako azokan Beñat Telleriak gazta nola egiten den erakutsiko du 11:30ean azokan bertan izango den tailerrean. Beñat Telleria abeltzain gaztea da, eta behi-gazta ekologikoa ekoizten du, Telleria gaztandegian fleckvieh arrazako behi-esnearekin egina.
2019an hasi zen lanean Mutiloako Odio familia-baserrian, eta bertan ari da, alde batetik, ekologikorekiko eta kalitatezko elikagaiak eskuz egiteko kontzientziarekin eta bestetik, baserriaren buruaskitasuna lortu nahian. Horretarako, Beñatek ekoizpena bi motatako produktuetan banatu du: gazta eta haragia, biak ekologikoak. Saltzen dituen gazten artean gazta urdina ere badago eta intxaurrak ere saltzen ditu.
Azokako erosketa bonuek jarraitzen dute
Beasaingo Udala Lehen Hezkuntzako lau ikastetxeekin batera elkarlanean ikasleek proposaturiko ideiarekin jarraituz, azokan erosketak egiteko ohitura bultzatu eta bertako ekoizleak laguntzea helburu duten erosketa bonuak salgai izango dira larunbat honetan ere. Lau ikastetxeek parte hartu dute Erosketa bonu hauen diseinuan. Bonuak 20 eurokoak dira, erosleak 10 euro ordainduko ditu eta Udalak beste 10 euroak jarriko ditu honela 20 euro gastatu ahal izateko. Bonu bakoitza 5 euroko lau zatitan banatuta egongo da eta pertsona bakoitzak bi bonu erosi ahal izango ditu gehienez.
Egitaraua
Larunbat honetako azokako egitaraua, hau izango da:
- 10:00 Bertako produktuen azokaren hasiera
- 11:30 Gazta egiten ikasteko tailerra Beñat Telleria gazta ekoizlearen eskutik.
- 12:00 Loinatz Musika Eskolako trikitilariek eta pandero joleek azoka girotuko dute.
- 13:30 Azokako produktuez osatutako 2 saskiren zozketa azokan erosketak egindakoen artean.
- 14:00 Bertako produktuen azokaren amaiera.
Bertako ekoizleen eta baserritarren lana balioan jarri eta kontsumitzaileek azoka eta bertako produktuak ezagutu eta horiek kontsumitzeak dituen onurak ezagutzera eman eta sustatzea da udalaren helburua. Era berean, bezero gazteak erakartzea eta harremanak sustatzeko topagune izatea ere bada asmoetako bat, azokak berarekin dituen onurek iraupena izan dezaten belaunaldi berrien artean.
Beñat bere gaztak erakusten gaztetxoei
Odio baserriko ikuilua
Gosari osasuntsua erakusten
- Xehetasunak
Bihar, martxoak 23, larunbata, “Planetaren ordua” izeneko ekimenean parte hartuko du Beasaingo Udalak. Gaueko 20:30etik – 21:30 era gune esanguratsuenetako argiak itzalduko dira.
- Igartzako jauregiko fatxada, zubi azpiko argiak eta burdinolako fatxada
- Barrendaingo biribilgunea
- Zaldizurretako biribilgunea
- Loinazko San Martin plaza bere osotasunean.
Udalak ekimen honen berri eman nahi du, herritarrek matxurak edo akatsak direla pentsa ez dezaten eta bestalde, ekimenaren zabalpena egiteko.
Planetaren ordua
Planetaren Ordua ingurumenaren eta pertsonen aldeko mundu mailako mugimendua da. Sidneyn jaio zen 2007an, klima-aldaketaren arazoari buruz ohartarazteko keinu sinboliko gisa. Eraikinetako eta monumentuetako argiak ordubetez itzaltzean datza keinu hori.
Planetaren Orduak ingurumenaren degradazioaren aurrean kezka adierazi eta honen aurrean jarduteko beharra erakusteko aukera ematen du.
