- Xehetasunak
Uztailaren 2an, goizeko 11:30etatik arratsaldeko 16:30 ingurura, herri barruko ibilbidea itxita egongo da oinezko zein ibilgailuentzat
Herritarrei egun horretan egin behar dutenari buruzko plangintza aldez aurretik egitea gomendatzen zaie
Datorren uztailaren 2an, Frantziako Tour-aren bigarren etapa Beasaindik pasako da. Mundu mailako sona duen txirrindularitza proba honek udalerria guztien begietan jarriko du une batez eta hori dela eta herri barruko mugikortasunean murrizketak eragingo ditu.
Hala adierazi dute agerraldian Leire Artola alkateak eta Aitor Escalante udaltzainburuak. Alkatearen esanetan, “maila honetako kirol ekitaldia gure herri barrutik igarotzea gauza handia da. Mundu guztira zabalik dagoen erakusleihoa da eta Beasain une batez hor agerian izango da. Baina honek, lasterketaren antolakuntzak eskatutako neurri zorrotzak betetzera behartu gaitu eta herritarren eta ibilgailuen mugikortasunean eragina izango du”.
Zehaztapenak Beasaingo Udaleko udaltzainburua den Aitor Escalantek eman ditu. Lasterketa Katea auzotik sartuko da; Igartza Oleta, Dolarea, Zapatari, Trenbide, Joan Iturralde, Zaldizurreta eta Ezkiaga etorbidea zeharkatuko ditu Ordiziaruntz abiatu aurretik. Honek errepidea “garbi” uztea eskatzen du. Hargatik, 400 ibilgailu-plaza hustu beharko dira ostiralerako. Hiri-altzariak, edukiontziak eta beste hainbat elementu kendu dira iada. Berdin aparkalekuak, badira egun batzuk hesiak eta ohartarazpenak jarri direla.
Ibilgailuak uzteko beste toki batzuk egokitu dira. Honela, Adif-eko nasa, CAF lantegiko aparkalekua edo Gudugarreta auzoan Estanda lantegiaren aurreko parking-a.
Ordutegia
Lasterketa pasako den herri barruko ibilbidea goizeko 11:30ean itxiko da. Trafikoa guztiz etenda geratuko da ordu horretan. 12:40 inguruan pasako da lasterketako publizitatea iragartzen duen karabana. Lasterketako txirrindularien tropela berriz, 14:40 aldera pasako dela aurreikusten da. Errepidea gurutzatzeko bi paso egongo dira: Barrendain plazan bata eta Joan Iturralde kalean bestea (Bernedoeneako parkinera joateko). Aurreikusitako ordutegia betez gero, 16:00ak aldera irekiko da berriz errepidea trafikora. Segidan lantaldea izango da hesiak kendu eta hiri-altzariak eta seinaleztapena berriro bere lekuan jartzen.
Osasun larrialdiak
Behin ibilbidea ixten denetik ezinezkoa izango da herri barruan ibilgailuan ibiltzea. Halaber ezin izango da herritik irten edo herrira sartu. Osasun larrialdiren bat izanez gero zuzenean 112 zenbakira deitu beharko da. Handik kudeatuko dituzte egoera berezi hauek.
Bestelako zalantzarik sortuko balitz egunotan, Beasaingo udaltzaingoarekin harremanetan jartzeko gomendioa zabaldu dute udal arduradunek egoera bakoitzari dagokion irtenbidea emateko (943 028080).
Azkenik, herritarrei egun horretan egin behar denari buruzko plangintza aldez aurretik egiteko gomendioa luzatu dute udal arduradunek azken orduko ezustekoak saihesteko.
- Xehetasunak
Udalak hitzarmena sinatu du BasqueCCAM elkartearekin, mugikortasun konektatuko, kooperatiboko eta autonomoko teknologiak testatzeko
Bi aldeak elkarlanean arituko dira Europako proiektuak erakartzeko eta udalerriko hiri eta landa errepideetan proba errealak egiteko
Era berean, ekimenek Beasaingo Hiri Mugikortasun Jasangarriko Planean zehaztutako erronkei erantzun nahi diete, beasaindarren mugikortasunean eragin positiboa izan dezaten
Mugikortasun konektatua, kooperatiboa eta autonomoa iraultza izango da mugitzen garen moduari dagokionez, bai ibilgailu pribatuan, bai garraio publikoan. Big Data, Adimen Artifiziala eta 5Garen aro berrian, ibilgailuak, azpiegiturak eta oinezkoak modu masibo eta etengabean komunikatuko dira, prozesuak optimizatzeko eta mugikortasuna ahalik eta jasangarriena izan dadin. Klima-krisiari aurre egiteaz gain, teknologia berriei esker, gero eta autonomia handiagoa dago gidatzeko, seguruagoa izan dadin eta errepideetako istripu-tasa murrizteko.
Beasaingo Udalak urratsak ematen jarraitzen du udalerria eta eskualdea mugikortasunaren sektorean erreferente izaten jarrai dezaten, proiekzio handiko enpresa, erakunde eta ekimenen eskutik, hala nola BasqueCCAM.
Beasain ikerketarako funtsezko toki
Heltze-fase handi batera iristean, teknologia guztiak benetako ingurune eta erabiltzaileetan probatu behar dira, behin betiko merkaturatzeko. Horixe da, hain zuzen ere, Udalaren eta BasqueCCAMen arteko akordioaren testuingurua. Beasaingo hiri-ezaugarriek, eta bereziki erdigunea Arriaran, Garin edo Astigarreta bezalako landa-auzoekin lotzen duten bigarren mailako errepideek, baldintza ezin hobeak eskaintzen dituzte landa-inguruneetan teknologiak probatzeko, orografia, trazadura bihurria eta ikuspen baldintza txikiak dituztelako.
Mugikortasun konektatua, kooperatiboa eta autonomoa aldatzen ari da mugitzeko dugun modua. Saiakuntzak, errepideetan eta bertatik igarotzen diren ibilgailuetan sentsoreak instalatuz egingo dira; datuak denbora errealean konektatzeko eta transmititzeko aukera emanez, ibilbideak optimizatzeko, eta bide-segurtasuna eta eraginkortasuna hobetzeko. Mugikortasun kooperatiboak ibilgailuen, azpiegituren, oinezkoen, Interneten eta abarren arteko komunikazioari egiten dio erreferentzia. Horri V2X komunikazioa esaten zaio, ibilgailua gainerako guztiekin komunikatzea. Azkenik, mugikortasun autonomoak gidaririk gabeko ibilgailuen aukera eskainiko luke, istripuak murrizteko, eraginkortasuna handitzeko eta garraiorako sarbidea errazteko. Aurrerapen teknologiko horiek mugikortasun eraginkorragoa, seguruagoa eta iraunkorragoa bermatzen dute, gure hiriak eraldatuz eta pertsonen bizi-kalitatea hobetuz.
Hitzarmenari esker, batetik, BasqueCCAMek mugikortasun kooperatibo, konektatu eta autonomoarekin lotutako teknologiak balidatu ahal izango ditu, eta, bestetik, sortutako datu errealen ustiapenean oinarritutako zerbitzuak garatu ahal izango ditu.
Horri guztiari garraioaren eta mugikortasunaren arloan nazioarteko proiekzioa duten enpresen hurbiltasuna gehitu behar zaio (CAF, Irizar). Goierriko enpresek beren teknologiak probatu ahal izango dituzte, eta, aldi berean, berrikuntza-ekosistema horren onurak jasoko dituzte, erreferentziazko nazioarteko eragileen presentziarekin.
Eragin zuzena beasaindarren mugikortasunean eta bizi-kalitatean
Teknologia garatzeaz eta baliozkotzeaz gain, lankidetza horri esker, Beasaingo Hiri Mugikortasun Jasangarrirako Planean 2023-2028 aldirako identifikatutako beharrei erantzun ahal izango die, batez ere landa-auzoetako mugikortasunari dagokionez. Helburua garraio eraginkorragoak, irisgarritasuna, osasungarritasuna, segurtasuna eta mugikortasun eredu iraunkorragoak bultzatzea da.
Erakundeen arteko lankidetza
Basque Connected Cooperative and Automated Mobility Center (BasqueCCAM) Mugikortasun Konektatuaren, Kooperatiboaren eta Autonomoaren Euskal Zentroa (Basque Connected Cooperative and Automated Mobility Center), irabazi asmorik gabeko elkartea da, eta mugikortasunaren industria (automobilgintza, autobusa, trenbidea, etab.) bultzatzea du helburu, ikerketa, garapen eta berrikuntzako ekosistema bat eskainiz. Eusko Jaurlaritzaren mende dago, eta hiru bazkide sortzaile ditu: Gertek enpresa, Euskadin erreferentea da mugikortasunaren kudeaketan eta monitorizazioan, AVL austriarra munduko liderra da CCAM softwarearen garapenean eta Vicomtech euskal ikerketa zentroa. Beasaingo Udala izango litzateke hirugarren bazkide laguntzailea, Gipuzkoako Foru Aldundiaren eta Bizkaiko Foru Aldundiaren atzetik.
Alvaro Arrue -BasqueCCAMeko ordezkaria- eta Leire Artola alkatea hitzarmena sinatzen
- Xehetasunak
Planak egiten dituen proposamen desberdinen informazioa partekatuko da martxoaren 7an, 18:00etan, Udaletxeko Batzar Aretoan egingo den saioan
Tailerraren helburua, esku-hartze proposamenak ekarpen berrien bitartez osatzea izango da, 2023-2028 indarraldirako behin-betiko dokumentua prest uzteko
Beasaingo Hiri Mugikortasun Jasangarrirako Planaren (HMJP) idazketa iritsi da bere azken fasera. Mugikortasunaren arloan parte hartzeko eta erabakiak hartzeko eratutako prozesu tekniko eta sozial hau, esku-hartze proposamenen atalera iritsi da.
2022ko urtarrilean planaren erredakzioa martxan jarri ondoren, uztailean diagnosi fasea burutu zen Beasain sakonki aztertu ondoren. Besteak beste, trafikoaren neurketa, aparkaleku plazen kontaketa, bidegurutzeen kategorizazioa, oinezkoen pasabideetako egoeraren azterketa, garraio publikoko geltokien inbentario eta balorazioa, eta bizikleten aparkaleku eta ibilbideen inbentarioa aurrera eraman ziren.
Azken hilabeteetako lanaren ondotik, dokumentuaren egileek udalerriak dituen gabeziak osatzeko esku-hartze proposamen bat landu dute, hain zuzen ere herritarrekin partekatu nahi den tailerrean azalduko dena. Saio honen helburua proposamenen zirriborroa azaldu eta eztabaidatzea izango da herritar eta eragile desberdinek izan ditzaketen proposamenak aztertu eta hala badagokio, behin-betiko dokumentuan txertatuak izan daitezen.
Lanketa tailerra eta behin-betiko esku-hartze proposamenak
Burutzear dagoen fase honetan, etorkizuneko agertokiak ezagututa, helburuetara iristeko esku-hartzeak, eragile eta herritarrekin kontrastatuko da. Horrela, hasierako eskakizunak eta helburuak bete diren jakin eta behin-betiko dokumentua osatuko da.
Tailerra datorren asteartean martxoak 7 ospatuko da Udaletxeko batzar aretoan arratsaldeko 18:00etan.
Planaren jarraipena
Behin dokumentua osatzen denean, etorkizuneko estrategiak zehaztu eta planifikatzeko gida baliagarri izango da Udalarentzat 2023-2028 epealdirako. Zentzu honetan, jarraipen eta ebaluazio bat egingo zaio dokumentuari, garraio eraginkorragoak, irisgarritasuna, osasun baldintzak, segurtasuna eta mugikortasun eredu jasangarriagoak bultzatzen jarraitzen dela ziurtatzeko.
Oinez, bizikletaz, eta garraio publikoan, gizarte kohesioa eta ingurumenaren babes eta defentsan oinarrituz, udalerrian bizi, lan egin edo edonolako aktibitatea garatzen dutenen bizi kalitate hobea bermatzea izango du azken xedea Mugikortasun Planak.
- Xehetasunak
Udala 2021a geroztik ari da etenik gabeko zerbitzu hau eskaintzen, eta horrek asteburuetako presentzia, prebentzioa eta arreta indartu ditu. Asteburuetako esku-hartzeak %35 igo dira azken urtean
Zerbitzuaren hedapenari esker, “etxera itzulera zaintza” bezalako neurriak eskaini ahal izan dira Loinatz jaietako gauetan
Ertzantzarekin elkarlanean, prebentzio-zaintza eta jarduketa gehiago egin dira etxebizitza, industrialde eta landa auzoetan
2021eko urtarriletik, udaltzaingoak urteko 365 egunetan ematen du zerbitzua udalerrian. Hori dela eta 1.300 zerbitzu-ordu gehitu dira herritarrari gertutasun eta segurtasun gehiago eskaini nahiean. Jasotako datuen arabera, balorazio positiboa egin du Udalak zerbitzuaren gehikuntzaren gainean. Asteburuetan programatutako ohiko eginkizunetatik kanpo, 2021ean 250 esku-hartze burutu ziren eta 2022an 355. Horrek, %35eko igoera suposatu du azken urtean.
Lehen urtean zerbitzuaren ezezagutzagatik ez ziren eskaera-dei ugari jaso, baina agerikoa da geroz eta gehiago eskatzen dela udaltzaingoaren zerbitzua eta asteburuetan dauden kultur eta kirol ekitaldietan presentzia honek harrera ona izan duela.
Ildo horretatik, udal-gobernuaren legegintzaldi-planean jasotako helburuetako bat bete da, udaltzaingoak urteko egun guztietan zerbitzua ematea alegia.
“Etxera itzulera zaintza” eta zerbitzu bereziak Loinatz Jaietan
Iaz lehen aldiz gau osoko zaintza eskaini zuen udaltzaingoak Loinatz jaietan, “etxera itzulera zaintza” delakoa indartuz. Etxera itzultzen diren gazteei eta batez ere emakumeei segurtasun gehiago eskainiz. Ekimenaren balorazioa positiboa izanik, 2023ko Loinatz Jaietan zaintza errepikatuko da. Honetaz gain, jaien kontestuan ematen diren mugikor eta diru-zorroen lapurretak ekiditeko egin ziren zaintza bereziak ere errepikatuko dira.
Gazteen alkohol eta droga kontsumoari lotuta, udaltzaingoak aurten ere sustantzia hauen inguruko sentsibilizazio hitzaldiak eskainiko ditu, herriko gazte eta gurasoentzat.
Udala eta Ertzaintzaren arteko koordinazioari jarraipena
Leire Artola alkatea eta Aitor Escalante udaltzainburua, Ertzaintzako herritarren segurtasuneko arduradunekin elkartu dira ohiko koordinazio lanen harira eginkizunen banaketa, funtzionamendua eta koordinazioa egituratzeko.
Ertzaintzarekin elkarlanean, etxe, garaje eta trastelekuetan lapurretak ekiditeko zaintza prebentiboak egin dira. Astebukaeretan gune industrialak ere zaindu dira eta uda garaian, landa auzoetan ere zaintza bereziak egin dira.
2023an Ertzaintzarekin lankidetzan, trafiko zaintzak egiten jarraituko du trafiko segurtasunean aurrera pausoak emateko. Aurreko urteetan bezala, 2022an egin ziren kontroletan, drogen efektupean gidatzeagatik salaketak eta txakurren ordenantza ez betetzeagatik (txakur arriskutsuak, txakurren gorotzak, erasoak…) isunak jarri ziren.
