Etxebizitza eskuratzea erraztea eta ondorioz, emantzipazioa sustatzea da laguntza hauen xedea

Establezimendu bat erosteko, alokatzeko edo eskualdatzeko aurtengo laguntzak emateko oinarriak ere onartu ditu Udalak

Beasain-Ormaiztegi bidegorria LED teknologiarekin argiztatzeko lanak kontratatu zituen gobernu batzordeak

Beasaingo Udalak etxebizitzaren alorrean 18-35 urte bitarteko gazteei eta mugikortasun urria dutenei etxebizitza alokatzeko erraztasunak ematea helburu izanik, etxebizitzen alokairurako dirulaguntzak emateko oinarriak onartu ditu. Herritar sektore ezberdinen egoera eta beharrak kontutan hartuta, horiei erantzun eraginkorra emateko erabakia hartu eta laguntza hauek banatzeko prozedura abian jarriko du honela. Erabakia, azken osoko bilkuran onartu zen EHBildu taldearen abstentzioarekin eta gainerako alderdien aldeko botuarekin. 

Kolektibo hauetan arreta jarriz, beraien testuinguru eta baliabide ekonomikoak kontuan hartuta, etxebizitza eskuratzea erraztea eta ondorioz, emantzipazioa sustatzea da laguntza hauen xedea. Dirulaguntza hauek bateragarriak izango dira Eusko Jaurlaritzak berriki onartu dituen Emantzipa programako laguntzekin . 

Izan ere, egungo gazteen arazo handienetako bat emantzipatzeko ezintasuna da. Lan-baldintzak, diru-sarrerak eta etxebizitzaren prezio altuak asko zailtzen dute bizitza autonomoa hastea. Mugikortasun urria dutenek ere etxebizitzaz aldatzeko edo euren egoerari egokitutakoa lortzeko bidea erraztea ere bada asmoa.

Diru laguntza hauek banatzeko ekimenarekin helburu hirukoitza lortu nahi da; gazteen emantzipazio bidean laguntzea, mugikortasun urriko pertsonek oztopo arkitektonikorik gabeko etxebizitzak izatea eta etxebizitza hutsen merkaturako sarbidea sustazea. 

Tokiko merkataritza biziberritzeko laguntzak 

Aurtengo ekitaldirako osoko bilkuran onartutako dirulaguntza lerroen artean, merkataritzari zuzendutakoak ere aurkitzen dira. Merkataritza sektorea biziberritzeko dirulaguntzak onartu ziren EHBilduren abstentzioarekin eta gainerako alderdien aldeko botuarekin. 

Hutsik dauden lokalak martxan jarri eta negozioen jarraipena bultzatzeko laguntzak dira. Establezimendu bat erosteko, alokatzeko edo eskualdatzeko orduan jarduera irekitzeak dakartzan gastuak gutxitzen lagundu nahi da eta bide batez, udalerriko establezimenduak irekita mantentzea.

Funtsean, bi dirulaguntza lerro jarriko dira martxan: oraindik martxan dagoen eta eskualdatu nahi den negozioa alokatzeko edo erosteko laguntzak. Eta bestetik, hutsik dauden lokalak alokatzeko edo erosteko dirulaguntzak. Informazio gehiagorako Udalera jo daiteke (Igunea).

Bidegorria argiztatzea

Beasain – Ormaiztegi bidegorrian led kaleargiak hornitu eta muntatzeko lanen kontratazioari onespena eman dio gobernu batzordeak. Asko dira egunerokotasunean bidegorri hau erabiltzen duten herritarrak goizean goiz edota eguneko azken orduetan lanerako joan-etorria bizikletaz egiteko. Baita ibilbide hau aisia garaian erabiltzen dutenak, korrika egin edo patinatzeko besteak beste. Esku-hartze honekin, bizikleta eta oinezko mugikortasuna sustatzeko baldintza hoberenak eskaini nahi dira, ibilbidea atsegina eta segurua izan dadin. 

Guztira 46 argi-puntu jarriko dira, zehaztu den bidegorriaren zatia behar bezala argiztatzeko. Lan hauek eskaripeko semaforo bat txertatzeko ere baliatuko dira, Ittola poligono parean, bertatik edo bertaruntz zeharkatu nahi duten oinezkoek segurtasun baldintza egokietan egin dezaten. Lizitazio prezioa 174.989,28 eurokoa da, BEZ barne.

Osoko bilkurako beste gaiak

Otsaileko osoko bilkuran onartutako gaien artean honako hauek aurkitzen dira: dirulaguntzak emateko onartutako oinarrien artean, aho batez onartu ziren udalerrian emakume eta gizonen arteko aukera berdintasuna sustatzen duten elkarteentzakoak; Kultura, kirola edo genero berdintasunera edo kontziliazio erantzunkidera zuzendutako ekintza edo jardueretarakoak; bertako produktuak merkaturatzeko eta kontsumoa sustatzekoak; XXVII. Igartza literatura bekara zuzendutakoa (%66ko igoera diru-sarian), eta gizarte izaerako laguntzena.  San Inazio eta Esteban Lasa kaleak berrurbanizatzeko proiektuko obrak esleitzeko proposamena onartu zen, PSE eta Podemos taldeen abstentzioarekin eta gainerako taldeen aldeko botuarekin. Construcciones Otegui-Gaztañaga S.L. enpresari esleitu zaizkio 2.548.960,64 euroan, BEZ barne.

Beasain etxebizitza gune tensionatua izendatzearen inguruko mozioa aurkeztu zuten EHBildu eta EAJ-PNVek. Bigarrena izan zen onartua.

Saltokietako errotuluak, irudi korporatiboa eta web-guneak euskaraz jarzeko dirulaguntzen oinarriak onartu ditu aho batez udalbatzak

Aurtengo Loinatz jaiak iragartzeko kartelen lehiaketako oinarriak onartuta,  martxoaren 17an amaituko da lanak aurkezteko epea

Gobernu batzordean, kale argiteria LED sistemara aldatzen jarraitu eta kiroldegian Powerlifting gela berria egiteko lanak kontratatzea onartu zen

2008 urteaz geroztik, Beasaingo udalak diru laguntzak ematen dizkie merkatarie saltokietako errotuluak, irudi korporatiboa euskaraz eta web-gunea euskaraz osorik edo elebitan/anitzetan jartzeagatik. Dirulaguntza hauen helburua merkataritza arloan hizkuntza paisaia euskalduntzea da, eta gaztelaniaz dauden errotulu nagusi eta irudi korporatiboko elementuak euskaraz jartzea.

Euskararen presentzia merkatal euskarrietan indartzeko konpromiso hori indartuz 2019an dirulaguntza oinarrietan aldaketa batzuk txertatu ziren eta diru kopurua handitu egin zen. Asmo horrekin jarraituz, merkatariek euren jarduera publizitatzeko asmoz errotuluetan, irudi korporatiboetan eta web orrietan euskara erabiltzen duten merkatariei eta jarduerei 2024 urterako dirulaguntzak arautzeko prozedura martxan jartzeko oinarriak onartu ditu aho batez udalbatzaren urtarrileko osoko bilkurak. 

Onartutako proposamenaren baitan, errotuluen kasuan, euskara soilik erabiltzen duten errotuluaren kostuaren %50eko dirulaguntza emango da, gehienez ere 240 euro emanez.

Irudi Korporatiboen kasuan, testua euskara hutsean jarriz gero kostuaren %50ean lagunduko du Udalak, gehienez ere 180 euro emanez. Interesdunak herritarren arreta eta informazio bulegora, Igunera, joan beharko dira eskaerak bideratzera. 

Web orriak euskaraz

Web-Orrien kasuan, 2024an %10 handitu egin du Udalak diruz lagundutako kopurua. Euskara hutsean jarri ezkero, kostuaren %60 finantzatuko du udalak, gehienez ere 470 euro arte eta euskara eta beste hizkuntza batean/batzuetan egonez gero, kostuaren %50 emango du Udalak, gehienez ere 380 euro. 

Orain arte web-orria euskara hutsean jarri ezkero, %50a finantzatzen zuen Udalak, gehienez ere 450 euroko zenbatekoarekin. Aldiz, euskara eta beste hizkuntza batean/batzuetan egonez gero web-gunea, kostuaren %40 laguntzen zuen, gehienez ere 360 euroko kopuruarekin. Aipatu iaz laguntza hauetaz baliatu ziren 17 onuradun izan zirela udalerrian.

Loinatz jaietako kartelak aukeratzeko lehiaketa

Behin oinarriak onartuta, 2024ko Loinatz jaiak iragartzeko kartelen lehiaketa zabalik egongo da lanak aurkeztu ahal izateko. Urteroko legez, helduen eta ikastetxeetako ikasleen kartelak aukeratzeko lehiaketak izango dira. 16 urtetik gorakoak aurkeztu ahal izango dira helduen lehiaketara eta adin horretatik beherakoak herriko ikastetxeetako gaztetxoak izango dira. Lanak aurkezteko epea martxoaren 17a arte egongo da zabalik.  

Urtarrileko osoko bilkuran aztertutako beste gai batzuk honakoak izan dira; TAO ordenantzaren aldaketaren hasierako onespena eta alegazioak aurkezteko epearen irekiera (bozketan aurka PSE -2-, abstenitu ziren EHBildu -5- eta Elkarrekin Podemos -1-, eta alde EAJ -9-). 

Tren zerbitzua hobetzeko eskaera mozioa

Irun eta Brinkola arteko ADIFen trenbidea eta Renferen aldiriko zein distantzia erdiko zerbitzuen kalitatea hobetzeko eskaerari buruzko mozioa bozkatu zen osoko bilkuran.

EHBilduren udal taldeak aurkeztutako mozioa aurrera atera zen EHBildu -5-, Elkarrekin Podemos -1- eta EAJren -9- aldeko bozekin. PSE-k -2- aurka bozkatu zuen. 

Led argiteria eta gimnasio berria

Beste alde batetik, Gobernu Batzordean Beasaingo herri argiteriko egungo kale-argien ordez LED sistemako argiak jartzeko hornidura eta muntaketa egiteko lanen kontratazioa esleitzeko onespena eman zen Loiola Norte enpresarekin. Lanek Nafarroa Etorbide amaiera eta kiroldegiaren arteko eremua hartuko dute, esleipen prezioa bez-a barne 126.495,54 eurokoa izango da eta lanen egikaritze epea 16 astekoa. Era berean Antzizar kiroldegian “Powerlifting” pisu libreko jarduera-gela gauzatzeko lanak Unebide obras y contratas S.L. enpresari esleitu zaizkio 214.698,77 euroko prezioan (bez-a barne) eta lanen egikaritze epea 15 astekoa izango da.

Gizarte arloari dagokionez, adineko herritarren premiak eta arriskuak antzemateko eta suteak prebenitzeko zerbitzua kontratatzeko baldintza pleguak onartu ziren.

Parekidetasuna eta ongizatea zeharlerro izanik, jasangarritasun ekonomiko, soziala eta ingurumenekoa izango dira aurrekontuen xede beasaindarren ongizatea hobetzeko

Oposizioko alderdien ekarpen gehinenak barneratuta, Alderdi Sozialista eta Elkarrekin Podemos abstenitu ziren eta EHBilduk aurka bozkatu zuen.  2024ko udal aurrekontua 21.7M  eurokoa izango da

Eguneroko kudeaketan aurrera eramandako zorroztasunak eta zuhurtziak, gogoa eta ilusioa pizten duten aurrekontuak onartzea ekarri du Leire Artola alkatearen hitzetan.  Etorkizunean garrantzi handiko proiektuak abian jarri ahal izango dira eta honen ondorioz, Beasain hobe bat izateko pausoak emango direla gaineratu du.

2024rako onartutako udal-aurrekontua 21.796.075,50 eurokoa izango da. Aurreko agintaldian abiarazitako proiektuak eta orain aurrera begira hasiko direnak bateratuko dira, garapen jasangarriaren bidea sendotasunez urratuz eta ingurumena errespetatzen duen udalerri gizatiarragoa eratuz. Bozketan, PSE alderdia (2) eta Elkarrekin Podemos (1) abstenitu egin ziren eta EHBilduk aurka bozkatu zuen (4). 

Herritarrak xede

Beasaindarren ongizatea eta bizi-kalitatea bermatzea dute helburu aurrekontu hauek.  Amarauna proiektuaren barruan, desgaituen arteko sozializazioa lantzeko, sentsibilizazio eta prebentzio saioak aurrera eramango dira. Belaunaldien arteko harremanak sustatzeko, gazteak eta adinekoak harremantzeko ekimenak jarriko dira martxan. 

Gazteengan arreta jarriz, nahi gabeko bakardadeari aurre egiteko egitasmoa abiatuko da, aurten burututako sorkuntza bateratu baten prozesuaren ondotik. Era berean, zaintzaren Tokiko Ekosistemak sustatzeko egitasmoa jarriko da martxan. Gazteleku zerbitzua berriz ere martxan jarriko da. 

Zahartze aktiboarekin lotutako proiektuek bere horretan mantenduko dira, gure adinekoen bizi-kalitatea prebentzioaren bidez hobetzeko. Ondo ibili ondo izan programak, Exercita  edota Euskadi Lagunkoiak esaterako.

Bizitza osasungarriagoa sustatzen duten programek belaunaldi gazteenei ere erreparatuko diete, eta elikadura-ohitura osasungarrienetara hurbilduko dituzte, tokiko eta sasoiko produktuen merkatua aitzakia hartuta. 

Honi lotuta, Gizarte Ongizate Saila indartuta eta beharrezko zerbitzu guztiak aktibatuta mantentzen da. 

Kultura, nortasuna eta ondarea 

Kalitatezko kulturaren alde eginez, ondare historikoa zaintzen duen orori zuzendutako laguntzak bere horretan darraite. Parrokian aurkitu diren horma-pintura errenazentistak bistaratzeko lanei babesa ematen jarraituko du Udalak, aurten ere Beasaingo Parrokiari dirulaguntza emanaz. 

Herriko elkarteak, Beasaingo herria bizirik mantentzen dute eta beraien egitasmoak aurrera eramateko behar besteko dirulaguntzak ematen jarraituko dugu.

Euskarak, nortasun-ikur eta komunikazio-hizkuntza den aldetik, babesa behar du,  euskararen ezagutza eta erabilera indartu dadin. Aittu euskara elkartearekin sinatuko den hitzarmena indartu egingo da; ikastetxeekin bat, hizkuntza-errefortzua zerbitzuarekin jarraituko da eta Udal Euskaltegiaren laguntzaz, ikastaro trinkoak eskainiko zaie herriko ostalariei, oinarrizko elkarrizketak euskaraz egiteko aukera izateko. 

Gazteen artean euskararen erabilera sustatzeko egitasmoak izango dute protagonismoa DBH4. mailako ikasleekin partekatuko den egitasmoarekin. 

Familietan, parkeetan,  euskararen erabilera sustatzeko ekimenak aurrera eramango dira, jolas tradizionalen ezagutza edota euskal musikarien abestiak transmititzeko aukerak probestuaz (Kantari ekimena)

Etxebizitza

Etxebizitza Hutsen azterketa jarriko da abian, etxebizitza hutstzat zer ulertzen den ongi zehaztu, Beasainen dauden etxebizitza hutsen kopurua dimentsionatu,  eta horien egoera ezagutuz, etorkizuneko etxebizitzen sustapenerako estrategiak bideratzeko.

Alor berdinean, Udalak laguntzak emango dizkie alokairuan dauden beasaindar gazteei emantzipazioa errazteko eta baita etxe jabeei ere, etxebizitza hutsak merkaturatu ditzaten.

Ekonomiaren sustapena

Tokiko ekonomia indartsu mantentzea funtsezkoa du Udalak. Ahalegin horretan, bertako azokaren eta merkataritzaren sustapenean eragiteko ekimen eta egitasmoak ez dute etenik izango 2024an. Larunbateko azoka berezian deskontu bonuak jaulkiko dira tokiko eta garaiko produktuen erosketa sustatzeko. 

Azokako ekoizle eta erosleei zerbitzu gehigarria eskaintzeko takilek izango dute jarraipena 2024an. Produktu galkorrentzako baliagarri izango diren takilak jarriko dira plazazpian, eta takila sarea hedatuko da herrian zehar.

Horretaz gain, azokaren irudia hobetzeko eta produktuak balioan jartzeko ekintzak eta kanpainak bultzatuko dira. Merkataritza sareari eta merkatariei zuzendutako formazioak, sentiberatze kanpainak eta ekitaldiak aurreikusi dira.

2023an landutako Berdintasun Planaren onarpenak, datozen urteetan aurrera eramateko ibilbide-orria zehaztuko du.

Espazio publiko atsegina eta kalitatezko zerbitzuak

Udalerriko espazio publikoa hobetu eta udal eraikinen eskaintzan aurrera pausoa emateko, udaberrian San Inazio-Esteban Lasa ardatzeko eraberritze lanak hasiko dira, ingurua  sozialki eta komertzialki biziberritzeko. Irisgarritasuna, bide segurtasuna eta gune atseginago bat bilakatzea dira proiektuaren ardatzak. 

Bestetik, Arana kalean, Bonberia kulturgune berria egokituko da. Herriko kultur eskaintza eta sorkuntza sustatzeko topagune izateaz gain, Bonberia aktibatzeak, Arana kalea biziberritzea ekarriko du.

Udal Bibliotekaren birgaitzea egingo da,  egungo beharrei erantzuteko helburuarekin, espazioaren eta zerbitzuen analisi bat egin ondoren.

Dolarea parkean komun publikoa jarriko da, parkeak egun duen erabileraren ondorioz, erabiltzaileen beharrak asetzeko asmoz.

Legealdi amaierarako Beasaingo kale argiteriaren %100 LED teknologiara aldatzea da helburua, horretarako 2024 hasieran trantsizio honen lehen fasea egikarituko da. Gune berrietan ere argiztapen esku-hartzeak egingo dira, hala nola Gudugarretako industrialdea eta Salbatore arteko bidegorria argiztatuko dira oinezko eta bizikleta erabiltzaileen erosotasun eta segurtasunerako.

Ingurumenaren zaintza eta mugikortasun jasangarria

Antzizar kiroldegian kontsumitzen den ura berotzeko Fundiciones del Estanda enpresaren bero soberakina aprobetxatzeko proiektua izango da ekimen aintzindarietako bat. Gainera, esku-hartze hau egiteko lanak baliatuz, Aldundiarekin lankidetzan Antzizarreko biribilgunea egikarituko da. 

Mugikortasun jasangarriari dagokionez, osasun etxea eta Olaberria lotuko dituen Oriako Bide Berdeak oinezko eta bizikletentzako lotura berri bat eskainiko die herritarrei eta Bizikleta alokairu-publiko zerbitzua ere martxan jarriko da, Beasaingo gune nagusiak garraiobide honen bitartez egitea erraztuko duena. 

Osoko bilkurako beste gaiak

Abenduko osoko bilkuran onartu ziren besteak beste, honako gai hauek; 2023ko ordainsarien igoerari dagokionez, aho batez onartu ziren langileen igoerak. Zinegotzi eta talde politikoenei dagokionez, EAJk alde bozkatu zuen eta gainontzeko alderdiek aurka. Igartza Futbol Zelaiko taberna ustiatzeko kontratazioaren baldintzak aho batez onartu ziren. San Inazio-Esteban Lasa kaleetako berurbanizazio lanen kontratazioaren alde egin zuten EAJ (9),  PSE (2) eta Elkarrekin Podemosek (1) eta EHBildu (4) abstenitu egin zen. Aurkeztu ziren bi mozioei dagokionez, pentsiodunek aurkeztu zuten mozioan, udal gobernuak aurkeztutako kontramozioa onartu zen eta zaintzari buruz EAJk aurkeztutako mozioa ere onartu zen.  

Parekidetasuna eta ongizatea ipar hartuta, jasangarritasun ekonomiko, soziala eta ingurumenekoa izango dira beasaindarron garapenerako oinarri 

“Urtetako zorroztasun eta zuhurtziak,  ilusioz betetako aurrekontuak proposatzeko aukera eman digu. Aurrekontua 21.7M  eurokoa izango da” adierazi du alkateak

Leire Artola alkateak “eguneroko kudeaketan aurrera eramandako zorroztasunak, gogoa eta ilusioa pizten digun aurrekontua aurkeztera garamatza” esanez aurkeztu ditu udal gobernuak ondu duen aurrekontu proposamena. Etorkizunean garrantzi handiko proiektuak abian jarri ahal izango dira eta honen ondorioz, Beasain hobe bat izateko pausoak emango direla gaineratu du.

Hau guztiagatik, 2024rako aurrekontu-proiektua 21.796.075,50 eurokoa izango da. Aurreko agintaldian abiarazitako proiektuak eta orain aurrera begira hasiko direnak bateratuko dira, garapen jasangarriaren bidea sendotasunez urratuz, ingurumena errespetatzen duen udalerri gizatiarragoa eratuz. 

Herritarrak xede

Beasaindarren ongizatea eta bizi-kalitatean eragitea du abiapuntu udal gobernuak. Ongizate emozionalean begia jarrita, belaunaldien arteko harremanak sustatzeko gazteak eta adinekoak harremantzeko ekimenak jarriko dira martxan. Gazteei arreta jarriz, nahi gabeko bakardadeari aurre egiteko egitasmoa abiatuko du Udalak. Baita, gazteen beharrak atzemateko HUEZIko fakultateko graduko ikasleekin proiektu bat garatzeko proposamena luzatu du.  

Zahartze aktiboarekin lotutako proiektuek bere horretan mantenduko dira, gure adinekoen bizi-kalitatea prebentzioaren bidez hobetzeko. Exercita programa eta Euskadi Lagunkoiak adineko pertsonekin elkar-eragiteko jarraituko dute. Bizitza osasungarriagoa sustatzen duten programek belaunaldi gazteenei ere erreparatuko diete, eta elikadura-ohitura osasungarrienetara hurbilduko dituzte, tokiko eta sasoiko produktuen merkatua aitzakia hartuta. Honi lotuta, Gizarte Ongizateko Saila indartuta eta beharrezko zerbitzu guztiak aktibatuta mantentzen da. 

Kultura, nortasuna eta ondarea 

Kalitatezko kulturaren aldeko apustu sendoa eginez, ondare historikoa zaintzen duen orori zuzendutako laguntzak bere horretan darraite. Berriki parrokian aurkitu diren horma-pintura errenazentistak bistaratzeko lanei babesa ematen jarraituko die Udalak. Jai eta kultur ekitaldien programazioa aurrera eramaten duten tokiko eragile eta elkarteekin dauden hitzarmenak egonkortzen dira. Elkarte horiek, herria bizirik mantentzeaz gain, kultura, kirola eta gizarte elkarteen partaidetza sustatzen dute, eta horrekin, modu eraginkorrean laguntzen dute Beasaingo artearen zabalkundean eta tradizioen aberastasuna mantentzen eta Beasaingo gizartea dinamizatzen. Arana kalea biziberritzeko helburu horretan txertatuko da Bonberia kultur eraikinaren proiektua eta Gipuzkoa plazaren lotuko duen ibai-gaineko pasabidea. 

Euskarak, nortasun-ikur eta komunikazio-hizkuntza den aldetik, babestua izango da, arlo guztietan, honen ezagutza eta erabilera indartu dadin. Aittu euskara elkartearekin, ikasleentzako hizkuntza-errefortzuarekin edo Euskaltegiekin sinatutako hitzarmenak indarrean jarraituko dute. Gazteen artean euskararen erabilera sustatzeko egitasmoak izango dute protagonismoa, familietan, parkeetan, edo musika emanaldien bidez (Kantari saioaren grabaketa). Bide horretan Euskaltegiak lanketa berezia abina jarriko du ostalariekin lanean euskara erabili dezaten oinarrizko elkarrizketetan trebatzeko. 

Ekonomiaren sustapena

Kalitatezko enpleguarekin Udalak duen konpromisoaz gain, tokiko ekonomia indartsu mantentzea funtsezkoa du. Ahalegin horretan mantenduz, bertako azokaren eta merkataritzaren sustapenean eragiteko ekimen eta egitasmoak ez dute etenik izango 2024an. Larunbateko azoka berezian deskontu bonuak jaulkiko dira tokiko eta garaiko produktuen erosketa sustatzeko. Horretaz gain, azokaren irudia hobetzeko eta produktuak balioan jartzeko ekintzak eta kanpainak bultzatuko dira. Merkataritza sareari eta merkatariei zuzendutako formazioak, sentiberatze kanpainak eta ekitaldiak aurreikusi dira.

Espazio publiko atsegina eta kalitatezko zerbitzuak

Lurraldea sailetik proiektu bereziak koordinatuko dira, udalerriko espazio publikoa hobetu eta udal eraikinen eskaintzan aurrera pauso bat emateko. Urte hasieran San Inazio - Esteban Lasa kaleko eraberritze lanak hasiko dira, udalerriko arteria honi aldaketa sakona ekarriko diotenak ingurua  sozialki eta komertzialki biziberritzeko. Irisgarritasuna, bide segurtasuna eta gune atseginago bat bilakatzea dira proiektuaren ardatzak. Bestetik, Arana kalean, Bonberia kulturgune berria eraikitzen hasiko dira. Herriko kultur eskaintza eta sorkuntza sustatzeko topagune izateaz gain, arestian aipatu bezala, Bonberiak Arana kalea biziberritzea du helburu.

Halaber, hiriko argiak LED teknologiara aldatzeko inbertsio garrantzitsu bat burutuko da Antzizar eta Igartza inguruan. Legealdi amaierarako Beasaingo kale argiteriaren %100 LED teknologiara aldatzea helburu duen esku-hartzearen lehen fasea izango da. Aldi berean, Gudugarretako industrialdea eta Salbatore arteko bidegorria argiztatuko da oinezko eta bizikleta erabiltzaileen erosotasun eta segurtasunerako.

Ingurumenaren zaintza eta mugikortasun jasangarria

Antzizar kiroldegian kontsumitzen den ura berotzeko Fundiciones del Estanda enpresaren bero soberakina aprobetxatzeko proiektua izango da ekimen aintzindarietako bat. Gainera, esku-hartze hau egiteko lanak baliatuz, Aldundiarekin lankidetzan Antzizarreko biribilgunea egikarituko da. Bestetik, Loinatz udal futbol-zelaiko harmailen estalkian plaka fotovoltaikoak jartzeari esker udal-eraikinak autohornitzeko energia berriztagarria lortzeko helburua osotasunean beteko da.

Mugikortasun jasangarriari dagokionez, osasun etxea eta Olaberria lotuko dituen Oriako Bide Berdeak oinezko eta bizikletentzako lotura berri bat eskainiko die herritarrei. Halaber, Bizikleta alokairu-publiko zerbitzua ere martxan jarriko da, Beasaingo gune nagusiak garraiobide honen bitartez egitea erraztuko duena. 

Horrekin guztiarekin, udal gobernuak aurrekontuen proiektua eta mugarririk garrantzitsuenak jakinarazi dizkie gainerako udal taldeei, eta horri buruzko galderei erantzun die. Hemendik aurrera, taldeek ekarpenak egin ahal izango dizkiote Gobernu Taldeak 2024rako egin duen udal kontuen proiektuari, abenduaren 5ean egingo den Udalbatzaren osoko bilkuran onartzeko aurkeztuko den azken dokumentuari gehitzeko.