Euskaltegiko eta Udaleko ordezkariek ikasturte berriko matrikulazio kanpainarekin batera aurkeztu dute plataforma berria

Euskarri honen bidez Euskaltegiaren zerbitzua eta komunikazioan aurrerapausoa eman nahi da herritarrengandik eta batez ere ikasleengandik hurbilago egoteko

Beasaingo Udalak Euskaltegiaren egungo beharrei erantzunez web berria estreinatu du. Euskaltegiaren presentzia eta komunikazioa indartze aldera egindako apustua izan da honakoa. Web orri propioa izateak herritarrengandik eta batez ere Euskaltegiko bezero eta ikasleengandik gertuago egoteko balioko baitu.

Halaxe adierazi du gaurko aurkezpenean Aitor Aldasoro alkate eta hizkuntza politika saileko buruak, “egungo komunikazio beharrei egokitzeko horrelako ataria ezinbestekoa da jendearengandik gertuago egoteko, esku-eskura”. Lelo hau aitzakia hartuta, “esku-eskura”, udalaren web orri berriaren hedapenaren bigarren fase honetan erabilera eta kontsulta indartu nahi da.

Euskaltegiaren webak eskainiko dituen zerbitzuen berri emateaz gain, Mari Paz Martin, euskaltegiko zuzendariak, ikasturte berriaren hasiera urriaren 2an izango dela eta, matrikulazio kanpaina iragarri du. Aurtengo kanpainak “ongi etorri euskara” leloa dauka eta eskaintza ugari eta anitza egin dutela aipatu du Beasaingo Udaleko hizkuntza politika gauzatu eta garatzeko ahaleginetan. Iaztik A1, A2 eta B1 mailetako tituluak Udal Euskaltegian bertan eskura daitezke baina hortaz gain, astean 8 edo 10 orduko moduloak, hiru hilabeteko ikastaro trinkoak, aurrez aurreko klaseak eta autoikaskuntza, sektore ezberdinentzako euskara klaseak, xede berezietarako ikastaro edo tailerrak eta garrantzitsua dena, langabetuek doan ikasteko aukera dutela azpimarratzekoak dira. Herriko ikastetxeetan ere DBHko ikasleentzat hizkuntza errefortzurako laguntza ematen da udal Euskaltegitik.

Guzti honetarako tresna baliagarria izango da web orri berria, non datu eta informazio interesgarria eskainiko den. Orria garatzerakoan, kontutan izan dira Euskaltegiaren beharrak eta hauei erantzunez, zalantzak argitzeko txokoa du, sarrera probak on line egiteko aukera, gestio desberdinak, ikaslearen txokoa eta sare sozialetarako sarbideak ere badaude. www.beasain.eus/euskaltegia

Udazken kulturaleko programazioa euskarri digitalean ezagutu eta kontsultatzeko “Esku-eskura” kanpaina aurkeztu da Udalaren web berriaren erabilera sustatzeko.

Herritik eta herriarentzat egindako egitarauan, kultur adierazpide guztiak txertatu nahi izan dira eta horretaz gain lehiaketa kopurua handitu da.

Beasaingo Udalaren ordezkariek herriko elkarteekin batera, aniztasuna eta kalitatea uztartzen dituen kultur eskaintza zabala antolatu dute eta euskarri ezberdinak jarri dira herritarren eskura egitaraua ezagutu eta kontsultatzeko, bai paperezkoak eta baita ere digitalak, horien artean, aurten estreinatu den Udalaren web berriaren agenda.

Aurkezpenean Xabier Matarranz, Udaleko kultura zinegotziak, adierazi duen moduan,   “Kultura  herriko txoko eta publiko mota guztiengana iristea da nahia. Eta, erronka horretan ezinbesteko bidelagunak ditugu herriko kultur elkarteak. Beasaingo  Kultura euskarriek ezin hobeto islatzen dute elkarlanaren filosofia hori: Udalak eta kultur eragileek indarrak batu ohi  ditugu herritarrei eskaintza zabala eta kalitatezkoa eskaintzeko xedearekin”. Aurtengoan  18 kultur elkartek  parte hartu dute egitarauaren osaketan.

Aniztasuna eta kalitatea

Oro har, ekitaldiak irailaren 20an hasiko dira  eta azaroaren 19an bukatu. 57 ekintza antolatu dira, horietako batzuk egitarau zabala dutenak, Boluntarioen eguna, Bertako produktuen azoka,  Jazpana, … esaterako.

Programa egiterakoan  kultur adierazpide edota diziplina guztiak izan dira kontuan, antzerkia, musika, dantza, bertsoa, eta baita publiko guztiak ere, umeak, gazteak, helduak.

Lehiaketen atalean, aurten bi gehiago izango dira, alde batetik  2018ko udal egutegia egiteko argazki lehiaketa antolatu da, gaia Parekidetasuna Beasaingo gizartean gai gisa hartuta eta bestetik, XXVI. errezil sagar lehiaketaren egunerako, sagar tarta lehiaketa  proposatu da herritarrek parte har dezaten.

Egitarauak, udalak bultzatzen dituen hainbat programatako ekintzak jasotzen ditu bere baitan, Igartza Musika edo hip hip urri esaterako. Urrian zehar familiei zuzendutako kultur aisia eskaintzaren barruan, aurten lehenengo aldiz eskualdeko beste bi Udalekin elkarlanean, urriaren 8rako Gabiriarekin eta Ormaiztegikoekin  mendi buelta dinamizatua antolatu da.

Beste programa esanguratsu bat  Ondarearen Europako jardunaldiak dira. Aurtengoan, Paisaia bizia, paisaien eraikuntza gaitzat hartuta, Gipuzkoako Foru Aldundiarekin  batera 3 ekintza antolatu dira eta horietako bat Arriaranen egingo da, bertako Intxaurpe elkartearekin elkarlanean antolatu delako.  Izan ere, gure kultura gure paisaia horiek sortzen dute, eraikin horiek, baserri horiek, pertsona horiek, herri nortasuna eratzen laguntzen dute eta.

Web berria indartuta

Udazken kulturaleko programazioa paperean aurkezteaz gain, euskarri digitalean izango duen garrantzia azpimarratu da. www.beasain.eus udal webgunearen eta agendaren kontsulta sustatzeko “Esku-eskura” kanpaina aurkeztu da.  Biak izango dira beharrezkoak, paperezkoan falta dena euskarri digitalean egongo delako, izan lehiaketetako oinarriak, izan egitarau zabalagoa edota  antzerkiaren sinopsiak.

Horretaz gain, webguneak bigarren fasearen barruan, azken hilabeteetan izan dituen hobekuntzak nabarmendu ditu Udal ordezkariak; Udal Euskaltegiak bere orri propioa izango du, laster aurkeztuko dena, baina haratago joanez, nabarmentzekoak dira albisteen presentzia, kontratatzailearen profilak profesionalen eskaerei egokitu izana, dokumentuen deskarga gunea udalaren argitalpen guztiekin, idatzi Udalari atala harreman zuzenerako eta herriari buruzko informazio guztia Bizi, Ezagutu eta Udala ataletan. Honi ere, iaztik erabilgarri dagoen mugikorretarako Beasain Kultura aplikazioa gehitzen zaio.  

Kanpaina honetan herriko zenbait eraikin publikoetako sarreretan tresna digitalen bidez webean sartzeko gonbita irudikatzen duten argazkiak jarriko dira. Irudi hauetan herritar ezagunak agertuko dira.  

  pdf Ikus egitaraua (6.06 MB)

2016-2017 ikasturtean helduentzako euskalduntze eta alfabetatze ikastaroak egin dituzten beasaindarrek uztailean eska ditzakete diru-laguntzak Udalean.

Onuradunek honako baldintza hauek bete behar dituzte:

  • Beasainen erroldatuta egotea
  • 16 urte beteta izatea
  • %85eko asistentzia

Informazio gehiago nahi izanez gero, kontsultatu oinarriak edo deitu 943 028063 telefonora.

pdf Oinarriak2016 (82 KB)

pdf Eskaera euskaraz (100 KB)

 “Paperezko txoriak” proiektuarengatik 6.000€ko sariaren erdia eta garaikurra jaso ditu berriztarrak eta urte beteko epea izango du liburua amaitzeko.

Ekitaldi berean, iazko irabazleak, Ekaitz Goienetxeak, “ Karramarroa trostan” lana entregatu ostean diru sariaren bigarren zatia jaso du eta datorren urteko otsailean aurkeztu ahal izango da.

ekaitzigartzabeka

Beasaingo Udalak idazle berrien sormena bultzatzeko helburuarekin sortu zuen beka. 20. edizioa izan den honetan, 20 lan aurkeztu dira. Hoietatik 13 emakumeenak eta 7 gizonezkoenak.

“Azken urteetan bataz beste aurkeztu diren lanen kopurua dozena ingurukoa izan bada, pozgarria eta batez ere sari honekin aurrera jarraitzeko nahikoa arrazoi eta indarra ematen du aurten aurkeztutako lanen kopuruak”, aipatu zuen aurkezpenean Xabier Matarranz kultur zinegotziak.

Uztailaren 1eko bertako produktuen azokan,Beasaingo Udalak lehenengo aldiz antolatu duen lorez apaindutako leiho eta balkoien lehiaketako sariak banatu zituen.

Usategi kaleko 5.zenbakian 3.A‐n bizi den Nerea UrangaTxintxurreta izan zen irabazlea.

Balkoi irabazlea

Bigarren saria, berriz, Kale Nagusiko 18. zenbakiko 1. solairuan bizi den Mª Asun Epelde Larrañagarentzat izan zen.

Bigarren saria

Irabazleak larunbatetako azokako lore‐postuetan gastatzeko 200€‐ko txekea jaso zuen eta bigarren saridunak 100€‐ko txekea.

Zorionak irabazleei!